भारतले नेपालमाथि अघोषित रुपमा नाकाबन्दी लगाएपछि बिषेश गरी नेपाली बजारमा इन्धन लगायत अत्यावश्यक धेरै वस्तुहरूको अभाव भयो। फलस्वरुप कालोबजारी गर्नेहरू मालामाल भए। जनता र देश माथि भने थप आर्थिक भार पर्यो र देशको अर्थतन्त्र समेत झण्डै धरासायी बन्ने अवस्थामा आइपुग्यो।
नाकाबन्दी भएपछि सरकारले वीरगञ्ज बाहेकका नाकाबाट भित्रिएको इन्धनलाई सञ्चित गरेर बेलाबेलामा सर्वसाधारणलाई वितरण गर्दै आएको छ यसको लागि भने सरकारलाई धन्यवाद दिनै पर्छ। हामी सर्वसाधारणले सरकारले वितरण गरेको इन्धन लिन दुई दिन लाइन बस्नुपर्ने बाध्यता छ तर सरकारी कर्मचारी र पुलिस प्रशासनका आफन्तहरूलाई भने सर्वसाधारणलाई जत्तिको झण्झट छैन।
सरकारी पम्पबाट वितरण गरिने इन्धन उनिहरूले सिधै लाइन नबसी त्यो पनि सरकारले तोकेभन्दा बढी लिन्छन्। निजी पम्पमा पनि उस्तै छ आफन्तहरूलाई सरकारले तोकेभन्दा बढी इन्धन दिन्छन् त्यसको कारण कतिपय लाईनमा बसेका उपभोक्ता इन्धन नपाएर फर्कनुपर्ने अवस्था छ। आफ्ना मान्छे माथिल्लो निकायमा नभएका हामीजस्ता सर्वसाधारणले इन्धन पाउन कति कष्ट भोग्नु पर्ने हो।