योजना बनाउनु एकदमै राम्रो हो।कार्यान्यन र व्यवस्थापन गरेर देखाउनु त झनै राम्रो। चुलोचुलोमा ग्यास पाइप फिट गरिदिने , हावाबाट बिजुली निकालेर एक वर्षभित्र देशलाई लोडसेडिङ मुक्त बनाउने ,डीजलवाला भुरुरु धुँवा छोड्ने बस होइन इलेक्ट्रोनिक बस चलाउने जस्ता महत्वपूर्ण घोषणा प्रधानमन्त्रीले गर्नुभएको छ। जुनकुरा पुरा गर्न उचित पूर्वाधार र आधारहरु चाहिने होइन र? बिना आधारको उखानटुक्का भन्नु र कार्यन्वयन गर्नु भनेको हत्केलाले सुर्य छोप्न खोज्नु जस्तै हो?
प्रधानमन्त्री ज्यू? नाकाबन्दीले गर्दा खाधान्य,इन्धन ,लताकपडा औषधिजस्ता आधारभूत आवश्यकताबाट जनताहरु बञ्चित भइरहेकोबेला हावादारी गफ गर्दै हिड्नु साह्रै लज्जास्पद भयो। भूकम्पपीडित जनतालाई एउटा कम्बल,प्लास्टिकको छानो दिन नसक्ने तर ठूला-ठूला सपना देखाउँदै हिड्नु साह्रै निर्लज्जपूर्ण हो।
शक्तिमा नपुग्दासम्म जे गरे पनि ,जसो गरे पनि ,जस्तोसुकै भाषण गरे पनि ठिकै थियो। तर प्रधानमन्त्रीजस्तो पदमा पुगेपछि त विश्वासै गर्न नसकिने सपना बाँड्दै हिड्नु आफ्नो कमजोरी गफले छोप्न खोजेको जस्तो भएन र? पहिले केही नेताले १० वर्षमा सिंगापुर र स्वीट्जरल्याण्ड बनाउँछु, मेलम्चीको पानीले काठमाडौंको सडक पखाल्छु भनेझैं भएको छ हावाको बिजुली र चुलोचुलोमा ग्यास पाइप। यो जनता झुक्याउने काम हो।
प्राविधिक रुपले सम्भव जस्तो लाग्न तर स्रोतसाधन र तत्परताको अभावले गर्दा तत्काल पुरा नहुने सपनामा हामी मुर्ख भइरहेका छौं।
प्रधानमन्त्री ज्यू! तपाईंले भाषण गरेका योजना सुन्दा साह्रै राम्रा लाग्छन्। तर यसरी भाषण गर्दै हिड्नुभन्दा स्रोतसाधन र योजनालाई विचार गर्नुपर्ने होइन र? सपना देखाउनु भन्दा यथार्थमा परिणत गर्नु धेरै कठीन छ। नेपालमा कहाँ छ इन्जीनियरिङ बेस्मेंटमा बनेको घर जहाँ तपाईंले भनेजस्तो चुलोमा ग्यासपाइप पुर्याउन सकियोस्। जबकी जनताले एउटा सिलिन्डर पाउन युद्ध जिते भन्दा गाह्रो भएको समयमा,एकभारी दाउरा दिन नसकेको अवस्थामा,ग्यास,पेट्रोल दिन नसकेको बेलामा ,कालो बजार नियन्त्रण गर्न नसकेको बिकराल स्थितिमा नेपाली जनताहरुको आखामा कहिलेसम्म छारो हाल्ने काम गर्नु हुन्छ प्रधानमन्त्री ज्यू?
पीठो बेचेर धनी हुने सपना देखेजस्तो चुट्किला र उखान टुक्काले देशलाई समृद्ध बनाउन सकिएला र? जुन देशको राजधानीमा पिउने पानी, इन्धन, लताकपडा, औषधि, ग्यासजस्ता अति आधारभूत आवश्यकता सहज रुपमा उपलब्ध हुन सकेको छैन त्यही देशका प्रधानमन्त्रीले यस्ता असम्भव सपना बाँड्दै हिड्नु हास्यास्पद छ ।