एउटा असल नागरिक भएर देशको सेवा गर्न कुनै पनि पार्टीको झोला भिर्नै पर्छ भन्ने जरुरी छैन। चाहे प्रजातन्त्रमा होस् चाहे गणतन्त्रमा होस् पार्टीको झोला भिरेर पार्टीबाटै बलीको बोका बनेका धेरै उदाहरणहरु छन्। त्यसैले एउटा असल नागरिकले कुनै पार्टीको सदस्यता नलिएर देशका नागरिकहरुको हितको निम्ति काम गर्ने बेला आएको छ।
अब हाम्रो देश नेपालमा यो दिन मात्र पर्खन बाँकी छ, गाउँ-गाउँबाट, वस्ती-वस्तीहरुबाट जनताहरुले अगुवा ईमान्दार समाजसेवी जसले समाज र देशलाई नै भलो हुने काम गरेको छ त्यस्तो व्यक्तिलाई नेतृत्व सुम्पिने दिन आउने छ।
जुनसुकै सरकार आएपनि निराशाजनक कार्यकाल टुङ्गिएको छ। जनताले उपलव्धीमुलक मुल्यांकन गर्न पाएकै छैनन्। नेपाली जनता सधैं चपेटामा परिनै रहे। जनताको चाहना नेताहरुले कहिल्यै पुरा गरेनन्, आफ्नै स्वार्थसिद्धको निमित्त मात्र राजनीति गरे।
नयाँ सरकारले पुरानै नेतृत्वको जस्तो काम नगरोस्। नयाँ सोच, नयाँ बिचारले सृजनशिल कामहरु गरेर अगाडी बढोस्। देशमा थुप्रेका कामहरु एक एक गरेर पूर्ण गरोस्। विपक्षी पार्टीहरुले पनि राम्रो काम गर्दा देशको निमित्त हो भन्ने ठानेर सहयोग गर्ने बेला हो, सत्तामा पुग्नको लागि मात्र उपाय गर्ने काम नगरौं। देश धेरै पछि परिसकेको छ।
अहिले हाम्रो देशमा पार्टीको व्यक्ति भन्दा पनि एउटा असल नागरिक भएर देशको निमित्त काम गर्ने बेला आएको छ। जताततै मनहरु भत्किएका छन्, आत्माहरु रोएका छन्, संरचनाहरु टुटेका छन्, सबै कुरा छताछुल्ल छ, यस्तो अवस्थामा पार्टीको कार्यकर्ता-नेता नभएर नेपालको एउटा ईमान्दार, सच्चा देशभक्त्त नागरिक भएर देशको निम्ति सोच्ने बेला आईसकेको छ।
अन्तिममा, देश भित्र भएका नेपाली हुन् या देश बाहिर भएका नेपाली हुन् सबैले आ-आफ्नो क्षेत्रबाट नेपालको निमित्त आफ्नो कर्तव्य पालन गर्न पछि नपरौं। बुद्ध र सगरमाथाको देश भनेर हामीहरुले जसरी गर्व गर्छौं त्यसै गरेर देशको निमित्त केहि राम्रो काम गरेर गर्व गर्न सकौं।