पछिल्लो सातादेखि नेपाली सञ्चारमाध्यममा मुख्य समाचार बनेका हाम्रो आदर्शका महानायक डा. गोविन्द केसीको अनशनलाई मैले नजिकबाट नियालिरहेको छु।
भोलिको सन्ततिले ‘देशमा जनताले आधारभूत अधिकारका रूपमा नि:शुल्क पाउनु पर्ने शिक्षा र स्वास्थ्य जस्तो अति नै संवेदनशील विषयमाथि राष्ट्रघात हुँदा तँ कुन कुनोमा लुकेर बसेको थिइस्? जसले गर्दा हाम्रो पुस्ताले यो अवस्था भोग्नु पर्यो’ नभनोस् भन्ने लागिरहन्छ।
राजनीतिका रूपमा संक्रमणजस्तै रहेको थाइल्यान्ड वा हाम्रो नजिकैको मुलक पाकिस्तान, जहाँ पटकपटक सैन्य कू हुने गरेको छ। तर, ती देश र त्यहाँका जनताको अवस्था हेर्ने हो भने संक्रमणकालले विकासको गतिलाई रोक्न सकेको छैन। नेपालमा चाहिँ सधैँभरि संक्रमणकाल अथवा यो वा त्यो बहानामा विकास बजेट भ्रष्टाचार गर्ने र निजीकरणको नाममा देस लुट्नेहरूलाई नै लाइसेन्स वितरण गर्दै सरकार र राजनीतिक दलहरू मुकदर्शक भएर बसेकाले नै देश अहिलेको अवस्थामा आइपुगेको हो।
प्रधानमन्त्रीजस्तो गरिमामय पदमा बसेको व्यक्तिबाट जुन किसिमको निरीहता र गैरजिम्मेवार अभिव्यक्ति आएको छ, यसबाट उनलाई बुढ्यौलीले छोएर स्वास्थ अवस्थाले साथ नदिएको हो कि भन्ने भान हुन्छ। यदि सत्ताको नै यति माया छ भने डाक्टर केसीको माग तत्काल पूरा गर्दा राम्रो हुन्छ। नत्र जनता भेडाबाख्रा होइनन् भन्ने कुरा पटकपटकका चुनावले पुष्टि गरिसकेका छन्। जनताले नरुचाएपछि राजा-महाराजाहरूले समेत सत्ता छोड्न बाध्य भएको सर्वविदितै छ।
हो म मान्छु, राजनीति गर्नेहरूको पनि परिवार हुन्छ। सत्तामा बस्न थोरै मात्रले अवसर पाउँछन्। आम्दानीको स्रोत अरु नहुने हो भने त्यो मानिस बाँच्नका लागि चन्दा वा भ्रष्टाचारमा भर पर्न थाल्छ। तर, त्यसो भन्दैमा के तपाईहरूको सबैको उद्देश्य छिटो पैसा कमाउने नै हो त माननीयज्यु? तपाईहरूले पनि त्यसो गरेपछि अरुले झन् के गर्लान् त? के मेडिकल खोल्नुबाहेक अरु काम गरेर देशमा रोजगारी सिर्जना गर्ने, खेर गइरहेको कच्चा पदार्थ पनि प्रयोगमा आउने र विदेशी मुद्रा पनि आर्जन गर्नेतिर लाग्दा हुँदैन र?
यदि मेडिकल कलेज खोल्न नै पर्ने हो, हाम्रो अर्बौँ लगानी गरिसक्यौँ भन्नुहुन्छ भने सर्प पनि मर्ने लाठी पनि नभाँचिने भनेझैँ गरेर हाल भइरहेकै कलेजहरूमा मर्ज गर्दा कसो होला? अहिले भएकै कलेजहरूको पनि मापदण्ड नपुगेको तथा तपाईहरूले सम्बोधन लिन खोज्नु भएकाले पनि मापदण्ड पूरा नगरेको कुरा त मिडियामा आइरहेकै छ। यसले गर्दा हाल भइरहेको कलेजको गुणस्तर पनि हुने थियो कि? पछि मेडिकलसम्बन्धी राम्रो नीति बनेपछि जे गरे पनि भयो नि! आखिर देशकै सेवा गर्ने भनेर नै त राजनीति गर्नु भको होला नि, होइन त माननीयज्यू।
- लेखक गण्डकी मेडिकल कलेजमा एमबिबिएस अध्यनरत छन्।