सधैँ सुरक्षित पहाडी भुभागमा बसेका मजस्ता थुप्रै पहाडी साथीहरुले राष्ट्रियताका नाउँमा अनावश्यक चर्का नारा उचालेको र काला अनुहारका सबै मान्छेलाई नेपालकै होइनन् जस्तो गर्ने अनि गोरो मान्छे छालाको बिमारी नै भएर रैछ भने पनि खुबै म्वाइँ खाउँला जस्तो गरेको मलाई कत्ति चित्त बुझ्दैन। देशको सीमानामा निरन्तर राष्ट्रियता र राष्ट्ररक्षामा लडिरहेका हाम्रा काला-गोरा सबै मधेशी, हिमाली र यस्को चिन्तन गर्ने सबै नागरिक सच्चा नेपाली राष्ट्रियताका रक्षक हुन्।
नेपाल भनेको पहाड मात्र होइन। हिमालको पानी पहाडका पतकरको मलिलो रस बटुलेर जब तराईका फाँटहरुमा सिचाईँ गर्दछ, तब मात्र नेपाली राष्ट्रियताको सुन्दर फूल तराईकै माटोमा फुलेर पहाड हुँदै, हुर्कँदै सगरमाथाको उचाइ चुम्ने छ। सबै नागरिकबीचको एकता कायम रहोस्। मेरा प्यारा साथीहरु कुनै पनि व्यक्ति खराब भयो भन्दैमा उस्को सम्बन्धित समुदायलाई गाली गर्ने तुच्छ काम तुरुन्त बन्द गरौँ र उँचो सोच राखेर त्यसो कसैले गरेछ भने पनि त्यो व्यक्तिकै दोष ठानेर चेतावनीसहित माफी गरौँ। ‘भोटे’, ‘पाखे’, ‘टोपी’, ‘धोती’, ‘भेले’, ‘पहाडे-काठो’ जस्ता समुदायलाई लक्षित गाली आजैदेखि गर्दै नगरौँ। वरिपरि कोही छैन भनेर गर्ने बानी हुन्छ, त्यो पनि तपाईँको स्वभावको प्रतिविम्ब हो, बन्द नै गरौँ।
मनले खाएको मान्छेलाई प्यारले मात्र त्यस्ता शब्दहरु प्रयोग गर्दा हुन्छ। विशेष हामी युवाहरु, हामीमाथि देशलाई एकताबद्द बनाउने गम्भीर दायित्व छ। तसर्थ हामी सचेत भएर बोल्ने गरौँ, व्यबहार गरौँ। डा. सीके रावत लाई पनि मेरो आग्रह यही हो। उहाँले पनि चित्त बुझेन भनेर समुदाय र पुरै राष्ट्रलाई नै गाली गर्नु चाहिँ नहुने पो हो कि। सम्पूर्ण नेपाली म आत्मैदेखि भन्दै छु हामी हरेक सचेत भएनौँ भने देश दुर्घटनाबाट बच्न सक्दैन। कृपया! कृपया! कृपया! कृपया! मनन गरौँ, सेयर गरौँ।
जय तराई, जय पहाड, जय हिमाल, जय मधेश!
जय देश, जय नेपाल, जय नेपाली!
सुदर्शन शर्मा (पुल्चोक क्याम्पस)
हाल: बबरमहल
