नेकपा एमालेका नेता माधवकुमार नेपालले बहुचर्चित अरुण तेस्रो जलविद्युत परियोजनाबाट लगानीकर्ता फिर्ता हुनुमा आफ्नो दल जिम्मेवार नभएको भन्दै पार्टीको बचाउ गरेका छन्।
भारतीय प्रधानमन्त्री नरेन्द्र मोदीका आसन्न नेपाल भ्रमणको अवसरमा दुई देशबीच हुने आपसी सम्झौताको विषयमा छलफल गर्न प्रधानमन्त्री सुशील कोइरालाले बालुवाटारमा डाकेको सर्वदलीय बैठकमा एमाले नेता नेपालले पार्टीको बचाउ गरेका हुन्।
बैठकमा सहभागी एक नेताका अनुसार मधेसी जनअधिकार फोरम लोकतान्त्रिकका अध्यक्ष विजयकुमार गच्छदारले विगतमा एमालेले विरोध गर्दै लगानीकर्तालाई पत्र पठाउँदा अरुण तेस्रो परियोजना रद्द भएको र मुलुक अहिले लोडसेडिङमा बस्नु परेको भनाइ राखेका थिए।
अहिले १७ वर्षपछि भारतीय प्रधानमन्त्री नेपालको भ्रमणमा आउँदा नेपालको राष्ट्रिय आवश्यकता र हितका लागि ११ सय मेघावाट विद्युत उत्पादन हुन सक्ने अरुण तेस्रो आयोजना निर्माणका लागि आग्रह गर्नु पर्ने भनाइ राखेको अखण्ड नेपाल पार्टीका कुमार खड्काले बताए।
त्यसको प्रतिवाद गर्दै एमाले नेता नेपालले विगतमा अरुण तेस्रो परियोजनाबाट लगानीकर्ता फिर्ता हुनुमा आफ्नो दलका कारण नभई तत्कालीन कामचलाउ सरकारका कारण भएको दाबी गरेका थिए। त्यतिबेला मुलुक मध्यावधि निर्वाचनमा जाने घोषणा भएको अवस्थामा कामचलाउ सरकारले यस्ता गम्भीर विषयमा निर्णय गर्न नहुने भनी आफूले विश्वबैँकलाई पत्राचार गरेको बताए। 'आफ्नो दलको विरोधपत्रको बाबजुद नेपालले अरुण तेस्रो परियोजना निर्माण गर्ने सम्झौता गरेको भए नेपाल गम्भीर रुपमा ठगिने थियो,' उनको भनाइ उद्धृत गर्दै खड्काले भने।
अब नेपालको भ्रमणमा भारतीय प्रधानमन्त्री मोदी आउँदा सानातिना योजनामा सहयोग माग गर्नुभन्दा राष्टिय हितसिद्ध हुने निश्चित ठूला योजनाको सञ्चालनका लागि केन्द्रित रही निर्माणका लागि आग्रह गर्नु पर्ने सुझाव नेपालले सरकारलाई दिएका थिए। 'हामीले भारतलाई कुनै पनि योजना निर्माण गर्न आग्रह गरी सम्झौता गर्दा त्यस्ता योजना पनि अगाडि नसारौं जस्लाई सम्झौता भएपछि पनि समयमा फेरि पूरा गर्न सकेन भन्ने आक्षेप नलागोस्,' नेपालले भने।
त्यसैगरी मधेसी जनअधिकार फोरम नेपालका उपेन्द्र यादवले भारतीय विदेशमन्त्री सुष्मा स्वराजको नेपाल भ्रमणका अवसरमा जस्तो गरी प्रधानमन्त्री मोदीसँग ४०/५० वटा ट्यूवेल निर्माण गरिदिने आग्रह नगर्न सुझाव दिएका थिए।
'जुन विषयमा सहमति र सम्झौता गर्ने हो, निश्चित विषयमा ठोस वार्ता र सहमति गर्नुपर्छ,' यादवले भने।
बिहान ८ बजेका लागि सर्वदलीय बैठक डाकिएको भएपनि झण्डै डेढ घण्टा ढिलो गरी शुरु भएको थियो। बैठकमा प्रधानमन्त्री सुशील कोइराला र परराष्ट्र मन्त्री महेन्द्रबहादुर पाण्डेले भारतीय प्रधानमन्त्री मोदीको भ्रमणका बारेमा जानकारी दिएका थिए।
सरकारको तर्फबाट अर्थमन्त्री रामशरण महतले पहिलोपल्ट भारतले नेपाललाई विशेष महत्व दिँदै उदार हृदय देखाएका बेला नेपालले भारतसँग उर्जा व्यापार सझौता, जलविद्युत विकास सझौता, सीमा विवाद लगायत व्यापार घाटाको विषयमा छलफल गर्नु पर्ने जानकारी दिएका थिए।
महतले भारतसँगको व्यापारघाटा कम गर्न कपर, गार्मेण्टजस्ता नेपाली बस्तुहरुको निर्यातमा कर छुट गराउन सके पनि त्यो घाटा केही हदले कम हुने बताएका थिए।
बैठकमा एमाओवादीका अध्यक्ष पुष्पकमल दाहाल प्रचण्ड उपस्थित भए पनि उनले आफ्नो पक्षबाट कुनै धारणा नराखेको एक नेताले बताए।
