काठमाडौँ, वैशाख १– एमाओवादी अध्यक्ष पुष्पकमल दाहाल 'प्रचण्ड' साताव्यापी चीन भ्रमणका लागि आइतबार त्यसतर्फ प्रस्थान गरेका छन्।
चीनको भ्रमणमा जानुअघि त्रिभुवन अन्तर्राष्ट्रिय विमानस्थलमा आइतबार गरिएको पत्रकार सम्मेलनमा आफ्नो चीन भ्रमण नेपालको स्थायित्व र आर्थिक समृद्धिका लागि हुने उनले बताए ।
उनले राष्ट्रिय हित र स्वार्थ अनुकूल छिमेकी मित्र राष्ट्रहरुले गरेको आर्थिक उन्नति र प्रगतिबाट फाइदा लिने गरी आफूले भ्रमणको सुरुवात गरेको जानकारी विमानस्थलमा उपस्थित पत्रकारमाझ जानकारी गराए ।
चीनका राष्ट्रपति, प्रधानमन्त्री, कम्युनिस्ट पार्टीका उच्च स्तरीय नेताहरुसँग पनि भेटवार्ता गर्ने कार्यक्रम रहेको जानकारी गराउँदै दाहालले चीन भ्रमणका समयमा आगामी संविधानसभा निर्वाचनलाई स्वतन्त्र, निष्पक्ष बनाउनका लागि सहयोगको आग्रह गरिने समेत बताए।
उनका साथमा पत्नी सीता दाहाल, सन्तु दराई, स्वकीय सचिव चुडामणि खड्कासहित अन्य केही सहयोगी छन् ।
चीन भ्रमण लगत्तै भारतको समेत भ्रमण गर्न लागेको जानकारी गराउँदै उनले दुवै छिमेकी मुलुकसँग समदुरीको सम्बन्ध राखेर नेपालको सर्वोपरी हितमा नै भ्रमण केन्द्रित हुने उल्लेख गरे ।
