अर्जेन्टिनी स्ट्राइकर कार्लोस टेभेज अनुबन्धित भएको चीनको संघई सेनुवाको रंगशालामा आगजनी भएको छ।
चीनको सुपर लिग क्लब सेनुवाको हङकोइ रंगशालामा मंगलबार बिहान आगो लागेको स्थानीय पत्रिकाले जनाएका छन्। आगोका कारण रंगशालाको प्याराफिट ध्वस्त भएको छ।
प्रहरी अधिकारीहरु अहिले आगोको कारण पत्ता लगाउन जुटेका छन्। घटनामा कोसैलाई क्षति नपुगेको बताइएको छ।
क्लबको व्यवस्थापकीय जिम्मा ब्रिगटनका पूर्व प्रशिक्षक गुस पोयटले लिएपछि उनले गत वर्ष टेभेजलाई करिब ५ अर्ब १८ करोड रुपैयाँको महंगो रकममा अनुबन्धित गराएका थिए।
क्लबले अन्य स्टार प्रिमियर लिग खेलाडीमा डेम्बा बा र ओबाफेमी मार्टिन्सलाई भित्र्याएको थियो। चिनियाँ सुपर लिग सिजन यसै महिना सुरु भएको थियो। आउँदो अप्रिल १६ मा क्लबले चाङचुवान याताईलाई आतिथ्य गर्ने कार्यक्रम थियो।