रेफ्रि विवादमा ४ खेल प्रतिबन्ध झेलेका लिओनल मेसीको अनुपस्थितिमा विश्वको सबैभन्दा उचाइँमा भएको बोलिभियाको राजधानी ला पेजमा खेलेको विश्व कप छनोटको खेलमा अर्जेन्टिना घरेलु टोलीसँग २–० ले पराजित भएको छ।
गत साता मात्र चिलीलाई पराजित गर्दै दक्षिण अमेरिकी क्षेत्रको छनोटमा तेस्रो स्थानमा उक्लिएको अर्जेन्टिनाका लागि यो नतिजा पीडादायक बन्ने पक्का छ। किनभने अंक तालिकामा अर्जेन्टिनालाई पछ्याइरहेको चिली र कोलम्बिया भिन्दा भिन्दै छनोटको अरु खेलमा आजै भिडिरहेका छन् र उनीहरुको जित्ने सम्भावनालाई नकार्न सकिन्न।
प्रशिक्षक इडगार्डो बाउजालाई खेल सुरु हुनुभन्दा करिब साढे ५ घण्टा अगाडि गहिरो धक्का लागेको थियो, जब फिफाले चिलीविरुद्धको खेलमा लाइन्सम्यानमाथि अभद्र व्यवहार देखाएको भन्दै मेसीलाई ४ खेलमा प्रतिबन्ध लगाउने निर्णय गर्यो। यसअघि उनले टोलीमा ७ खेलाडी परिवर्तन गरेका थिए। जसमा म्यानचेस्टर सिटीका स्ट्राइकर सर्जियो अगुइरोलाई ड्रप गर्दै साओ पाउलोको स्ट्राइकर लुकास प्राटोलाई मेसीको सहयोगीको रुपमा टिममा समावेश गरिएको थियो।
अर्जेन्टिना सस्पेन्सनमा रहेका जाभियर मास्चेरानो, निकोलास ओटमेन्डी, लुकास बिग्लिया, गोन्जालो हिग्विन तथा चोटग्रस्त गाब्रियल मार्काडो र इमानुअल मेस बीना नै कमजोर देखिसकेको थियो। त्यसमा पनि मेसीको प्रतिबन्ध बाउजाका लागि ठूलो चुनौती बन्न पुग्यो।
समुन्द्री सतहभन्दा ३ हजार ६ सय ४० मिटरको उचाइँमा खेलिएको यस खेलमा अर्जेन्टिनी खेलाडीहरु अक्सिजनका लागि संघर्ष गर्दै गरेको देखिए। १२ वर्षयता बोलिभियालाई उसैको मैदानमा हराउन नसकेको अर्जेन्टिनाविरुद्ध ३० मिनेटमा हुँवा कार्लोस आर्केले हेडिङमार्फत गोल गर्दै घरेलु टोलीलाई पहिलो हाफमै अग्रता दिलाए।
दोस्रो गोल मार्टिन मार्टिन्स मोरेनोले ५३ मिनेटमा अर्जेन्टिनाको खराब डिफेन्सको फाइदा उठाउदै गरे। अर्जेन्टिनाबाट पेरिस सेन्ट जर्मनीका मिडफिल्डर एन्जल डि मारियाले केही खतरनाक प्रहार गरे पनि घरेलु टोलीको आत्मविश्वासको अगाडि त्यो प्रभावशाली देखिएन्।
अर्जेन्टिना १४ खेलमा २२ अंकमै खुम्चिएको छ। अब उसले ४ खेल खेल्न बाँकी छ। दक्षिण अमेरिकी छनोमा शीर्ष ४ स्थान बनाउने टोली सिधै विश्व कपमा छनोट हुन्छन्। पाँचौ टिमले ओसियाना क्षेत्रसँग प्लेअफ खेल्न पाउछ।
पराजय भोगे पनि हाल अर्जेन्टिना तेस्रो स्थानमा छ। तर, चिली, कोलम्बिया वा इक्वेडरमध्ये एकले अघिल्लो खेल जितेको खण्डमा अर्जेन्टिना पाँचौ स्थानमा झर्नेछ। चिली तालिकाको पुछारमा रहेको भेनेजुएलासँग खेल्दै छ। कोलम्बिया र इक्वेडर पनि भिडिरहेका छन्।
हाल अंक तालिकामा अर्जेन्टिनापछि कोलम्बो २१ अंकका साथ चौथो, इक्वेडर २० अंकका साथ पाँचौ र चिली पनि २० अंकका साथ छैटौं स्थानमा छन्।
