पहिले डिफेन्डर कप्तान विराज महर्जन चोटका कारण मैदानमै उत्रिन नसक्नु, त्यसपछि १२ मिनेटमा विक्रम लामा रातो कार्ड पाएर मैदानबाट बाहिरिनु, नेपाली फुटबलका लागि आजको दिन बिर्सनलायक बन्न पुग्यो।
उच्च मनोबलका साथ एएफसी एसियन कप छनोट अन्तर्गत फिलिपिन्सविरुद्ध पहिलो खेल खेल्न गएको नेपालका लागि आजको खेल कुनै दृष्टिकोणले सम्झनायोग्य बनेन।
३५ वर्ष अगाडि थाइल्यान्डको बैंककमा आयोजना भएको किङ्स कपमा फिलिपिन्सलाई १–० ले हराएको पुरानो इतिहास बोकेर मनिला पुगेको नेपाल ४–१ गोलले पराजित भयो।
विराजको अनुपस्थितिमा भरत खवासको कप्तानीमा उत्रिएको नेपालका लागि त्यतिबेला ठूलो झट्का लाग्यो, जब विक्रमले १२ औं मिनेटमा रातो कार्ड पाए। फिलिपिन्सका स्ट्राइकर इयान राम्सेको क्रस बल डिबक्समा अनमार्क रहेका जाभियर पानिटोले दोस्रो बार च्यापेर उत्कृष्ट हेडिङ गरेका थिए। जुन बललाई गोलकिपर किरण चेम्जोङ जोगाउन असफल भएपछि गोल लाइनमा उभिएका विक्रमले हातले पोस्टतर्फ गइरहेको बललाई रोकेका थिए। जसका कारण रेफ्रिले उनलाई रातो कार्ड देखाउँदै फिलिपिन्सलाई पेनाल्टीको अवसर प्रदान गरेका थिए। तर, किरणले घरेलु टोलीका कप्तान फिल योङहजबेन्डले हानेको पेनाल्टीलाई रोकेर नेपाली खेमामा उत्साह थपे।
तर, त्यो उत्साह धेरै बेर टिकेन। कप्तान फिलसँगै जाभियर पानिटो, इयान राम्से र डेनिस भिलानुएभाको स्तरीय सम्वन्यका कारण नेपालले २८ मिनेट भित्रै ३ गोल खान पुग्यो। खेलको सुरूवातमा आक्रामक देखिएको नेपाली खेल विक्रमको रातो कार्डपछि सेलाएको थियो। विक्रमको वर्हिगमनपछि नेपाली खेलाडीले १८ मिनेट संयमता अपनाउन नसक्दा खेल हातबाट फुत्कियो।
खेलको २१ औं मिनेटमा रवीन श्रेष्ठको खराब ट्याकलका कारण फिलिपिन्सले पुनः दोस्रो पेनाल्टी पायो। फिलिपिनो खेलाडीको लामो पासमा रवीनले माइक ओटलाई डिबक्समा लडाएका थिए। यतिबेला कप्तान फिलले कुनै गल्ती गरेनन् र उनले पेनाल्टीमार्फत पहिलो गोल गरे। फिलले २३ मिनेटमा दोस्रो गोल थपेका थिए।
नेपालको तासको पत्ता झै भताभूङ भएको डिफेन्सलाई चिर्दै २८ मिनेटमा राम्सेले अर्को गोल गरेका थिए। यो उनको ४५ औं अन्तर्राष्ट्रिय गोल थियो।
नेपालले पहिलो हाफमा एक पल्ट मात्र राम्रो मुभ बनायो। जसमा गोल पनि निकाल्यो। डिफेन्डर रवीन र मिडफिल्डर सुजल श्रेष्ठको उत्कृष्ट मुभमा विशाल राईले पहिलो हाफको खेल सकिन ३० सेकेन्ड बाँकी हुँदा गोल गरे।
ओभरल्यापमा आएका रवीनलाई सुजलले डिबक्सभित्र पास उपलब्ध गराएका थिए। जसलाई चिप गर्दै रवीनले डिबक्सभित्र दौडिरहेका विशाललाई उपलब्ध गराए। विशाल २९ औं मिनेटमा अन्जन विष्टलाई पद्स्थापन गर्दै मैदानमा प्रवेश गरेका थिए।
उनको त्यो पहिलो अन्तर्राष्ट्रिय गोल थियो। उनले ३५ वर्षअघि नेपालका पूर्व स्ट्राइकर गणेश थापाले फिलिपिन्सविरुद्ध गोल गरेको कीर्तिमानलाई बराबरी गरे। थापाले १९८२ को किङ्स कपमा फिलिपिन्सविरुद्ध गोल गरेका थिए। त्यो नै अहिलेसम्म नेपालले फिलिपिन्ससँग गरेको गोल थियो।
२०११ र २०१४ को बीच नेपालले फिलिपिन्ससँग ३ वटा मैत्रीपूर्ण खेल खेले पनि कुनै गोल गर्न सकेको थिएन।
दोस्रो हाफमा नेपालले सुधारिएको खेल खेल्यो। फिलिपिनो खेलाडीलाई कडा निगरानीमा राखे पनि ७२ मिनेटमा पानिटोले गोल गरे।
नेपाल सन् २०११ मा फिलिपिन्ससँग मैत्रीपूर्ण खेलमा ४–० ले पराजित भएको थियो। त्यसको ६ वर्षपछि नेपालले फेरि घरेलु टोलीसँग फराकिलो पराजय भोग्यो।