अस्ट्रेलियाविरुद्ध चौथो तथा अन्तिम टेस्टमा भारतले पकड जमाएको छ। पहिलो इनिङमा भारतसँग ३२ रनले पछि परेको अस्ट्रेलिया दोस्रो इनिङमा १ सय ३७ रनमा खुम्चिएपछि भारत जितको नजिक पुगेको छ।
भारतलाई जितको लागि अब ८७ रनको मात्र आवश्यक छ। सोमबार तेस्रो दिन भारतलाई ३ सय ३२ रनमा अल आउट गरेको भ्रमणकारी टोली भारतका तीन बलरको धरापमा पर्न पुग्यो।
भारतका उमेश यादव, रवीन्द्र जडेजा र रवीन्द्रन अश्विनले ३–३ विकेट लिएका थिए, जसका कारण अस्ट्रेलिया सस्तोमा समेटियो। सन् २००० मा न्युजिल्यान्डविरुद्ध इडेन गार्डेनमा तीन भारतीय बलरले ३–३ विकेट लिएका थिए। १७ वर्षपछि भारतले यो सफलतालाई दोहर्याएको हो।
अस्ट्रेलियाको दोस्रो इनिङमा ग्लेन म्याक्सवेलले सर्वाधिक ४५ रन बनाए। अस्ट्रेलियाको दोस्रो इनिङ समाप्त हुँदा भारतलाई जितको लागि १ सय ६ रन आवश्यक थियो। सोमबार नै दोस्रो इनिङको सुरुवात गरेको भारतले कुनै विकेट नगुमाई १९ रन बनाइसकेको छ। केएल राहुल १३ र मुरली विजयी ६ रनमा अविजित छन्।