भारतले चौथो तथा अन्तिम टेस्टमा अस्ट्रेलियाविरुद्ध पहिलो इनिङमा ३२ रनको अग्रता बनाएको छ।
अस्ट्रेलियाले पहिलो इनिङमा बनाएको ३ सय रनको जवाफमा भारतले सोमबार तेस्रो दिन भोजनको समय अगाडि सबै विकेट गुमाएर ३ सय ३२ रन बनायो।
सातौं विकेटका लागि रवीन्द्र जडेजा र रिद्धिमान शाहले ९६ रनको साझेदारी गरेपछि भारतले अग्रता बनाएको हो। जडेजाले पुछारमा ६३ रन बनाए। उनले ४ छक्का र ४ चौकाको सहयोगले छिटो रन बनाए।
घरेलु लिगमा तीन सय रन बनाए पनि ठूलो खेल खेल्न नसकेका जडेजाले आज भने अर्धसतकीय इनिङ खेले। उनले टेस्टमा एकै सिजन ५० विकेट लिनुको साथै ५ सय रन पनि पुरा गरेका छन्।
भारतका लागि कुनै पनि व्याट्सम्यानले सतक बनाउन सकेनन्। केएल राहुलले ६०, चेतेश्वर पुजाराले ५७ र जडेजाले ६३ रन बनाए। यसबाहेक कप्तान अजिङ्के रहाणेले ४६, रवीचन्द्रन अश्विनले ३० र रिद्धिमानले ३१ रन बनाए।
जडेजा र रिद्धिमानको साझेदारीलाई तोडेको अस्ट्रेलियाले २१ बलभित्र ३ भारतीय ब्याट्सम्यानलाई पवेलियन पठाएको थियो। नेथन लायनले फेरि ५ विकेट लिए। यस्तै पेट कमिन्सले ३ विकेट लिएका थिए।
