१८ वर्षका युवा लेगस्पिनर सद्धाव खानले आफ्नो डेब्यु खेलमै ४ ओभरमा ७ रन मात्र खर्चेर ३ विकेट लिएपछि पाकिस्तानले वेष्ट इन्डिजविरुद्धको पहिलो टि–२० ६ विकेटले जितेको छ।
हाल वेष्ट इन्डिज भ्रमणमा निस्किएको पाकिस्तानले नेपाली समयअनुसार सोमबार बिहान सम्पन्न पहिलो टि–२० मा टस जितेर घरेलु टोलीलाई ब्याटिङको निम्तो दिएको थियो।
सद्धावले आफ्नो अघिल्लो ८ बलमा तीन घरेलु ब्याट्सम्यानलाई पवेलियनको बाटो देखाएपछि वेष्ट इन्डिज संकटमा परेको थियो। क्यारेबियन टोलीले ४९ रन जोड्दा ६ विकेट गुमाइसकेको थियो। तर, पुछारमा कार्लोस ब्रेथवेइट र किरोन पोलार्डले बिस्फोटक ब्याटिङ गरेपछि वेष्ट इन्डिजले कूल योगफल ८ विकेटको क्षतिमा १ सय ११ रन पुर्यायो।
प्रत्युत्तरमा ब्याटिङ गर्न उत्रिएको पाकिस्तानको पनि सुरुवात सोचेजस्तो राम्रो हुन सकेन्। भ्रमणकारी टोलीले ४९ रनमा ३ विकेट गुमाइसकेको थियो। तर, बाबर आजम र सोहेब मल्लिकले खेललाई जिततर्फ डोर्याए।
बाबरले २९ र सोहेबले अविजित ३८ रन बनाए। प्रारम्भिक ब्याट्सम्यान कमरान अकमलले पनि २२ रन बनाए। पाकिस्तानले १७ बल खेल्न बाँकी रहँदै जितलाई सम्भव तुल्यायो।
