नेदरल्यान्ड्सले विश्व कप छनोटअन्तर्गत बुल्गेरियासँग २–० ले पराजय भोगेको २४ घण्टा नबित्दै प्रशिक्षक डानी ब्लिन्डलाई बर्खास्त गरेको छ।
समूह एतर्फ आइतबार बिहान सम्पन्न खेलमा नेदरल्यान्ड्स आफूभन्दा कमजोर मानिएको बुल्गेरियासँग पराजित भएको थियो। ५५ वर्षीय ब्लिन्डलाई वार्ताको लागि बोलाएको डच फुटबल संघले केही समयको वार्तलापपछि बर्खास्त गर्ने निर्णयमा पुगेको हो।
बुल्गेरियासँगको पराजयपछि नेदरल्यान्ड्सको विश्व कपमा छनोट हुने सम्भावना कमजोर भएको छ। नेदरल्यान्ड्स ५ खेलमा ७ अंक बटुल्दै समूह एको चौथो स्थानमा छ।
गत जुलाईको पहिलो साता संघले गुस हिडिन्कलाई बर्खास्त गरेर ब्लिन्डलाई पदभार सुम्पिएको थियो।
