स्टार स्ट्राइकर रोबर्ट लेवान्डोस्की र लुकाज पिस्जेकको गोलमा घरेलु मोन्टेनेग्रोलाई २–१ गोलले पराजित गर्दै पोल्यान्डले विश्व कप छनोटको समूह ईको शीर्षस्थानलाई कायमै राखेको छ।
नेपाली समयअनुसार बिहान सम्पन्न खेलमा पिस्जेकले खेल सकिन ८ मिनेट बाँकी रहँदा गरेको गोल नै निर्णायक बन्न पुग्यो। उनले ८२ मिनेटमा गोल गरे।
यसअघि पहिलो हाफको ४० मिनेटमा लेवान्डोस्कीले भ्रमणकारी टोलीलाई अग्रता दिलाएका थिए। विश्व कप छनोटमा लेवान्डोस्कीको आठौं गोल थियो। मोन्टेनेग्रोले ६३ मिनेटमा स्टेफन मुगोसाको गोलमा खेललाई बराबरीमा ल्याएको थियो।
समूह ईको यो जितपछि पोल्यान्ड १३ अंकका साथ शीषस्थानमा यथावत छ। उसले आफ्ना प्रतिद्वन्दी मोन्टेनेग्रो र डेनमार्कसँगको दुरी ६ अंकको बनाएको छ। दुवै देशको ५ खेलबाट ७ अंक छ। डेनमार्कले सोमबार बिहान भएको अर्को खेलमा रोमानियालाई गोलरहित बराबरीमा राख्यो। रोमानिया ६ अंकका साथ चौथो स्थानमा छ।
यही समूहको पुछारमा रहेका कजाकिस्तान र आर्मेनियाविरुद्ध आइतबार राती भएको अर्को खेलमा आर्मेनिया २–० ले विजयी भएको थियो। आर्मेनियाको पनि ६ अंक छ।