स्पेनिस क्लब रियल म्याड्रिड मैदानमा उत्रिँदा करिम बेन्जेमा बिना टोलीको निमार्ण नै हुँदैन। तर, फ्रान्सले फुटबल खेल्दा उनी जहिले टिमबाट बाहिर हुन्छन्।
आफ्नो जमानाका सबैभन्दा प्रभावशाली फ्रेन्च स्ट्राइकर विगत २ वर्षदेखि राष्ट्रिय टोलीमा स्थान बनाउन असफल रहेका छन्। गएराती फ्रान्सले विश्व कप छनोटअन्तर्गत लुक्जेम्बर्गविरुद्ध खेल्दा प्रशिक्षक डिडिएर डेस्च्याम्प्सले फेरि बेन्जेमालाई मौका दिएनन्।
बेन्जेमा पछिल्लो २० खेलदेखि राष्ट्रिय टोलीमा स्थान बनाउन असफल रहेका छन्। उनी अन्तिम पल्ट ट्राइकलर जर्सीमा देखिदा उनले अर्मानियाविरुद्ध दुई गोल गर्नुको साथै गोलका लागि एउटा मौका मिलाएका थिए। मैत्रीपूर्ण त्यो खेल फ्रान्सले ४–० ले जितेको थियो।
बेन्जेमाले राष्ट्रिय टोलीबाट लामो समय बाहिर बस्नु पर्दा दुःख लागेको प्रतिक्रिया दिएका छन्। उनले रियल म्याड्रिडको रेडियोलाई अन्तर्वार्ता दिँदै भने–‘जब तपाई रियल म्याड्रिड जस्तो ठूलो क्लबबाट खेल्नु हुन्छ र राष्ट्रिय टोलीबाट बाहिर बस्नु पर्छ। यसरी बस्न निकै गाह्रो हुन्छ।’
२९ वर्षीय बेन्जेमाको २०१८ को विश्व कप अन्तिम भन्दा पनि फरक पर्दैन। तर, राष्ट्रिय टोलीमा स्थान नपाउदा उनको अन्तिम विश्व कप खेल्ने अभियान कठिन देखिन्छ। बेन्जेमाले ८१ खेलमा २७ गोल गरिसकेका छन्। उनी रियल म्याड्रिडका फ्रेन्च पूर्व स्ट्राइकर जिनेदिन जिदानका प्रिय खेलाडीमा पर्छन्। जिदान हाल रियलको प्रशिक्षक छन्। बेन्जेमाको खेलेको तारिफ गर्दै रियल अध्यक्ष फ्लोरेन्टिनो पेरेजले भर्खरै भनेका थिए, ९ नम्बरको जर्सीमा बेन्जेमा विश्वकै उत्कृष्ट खेलाडी हुन्।
बेन्जेमालाई राष्ट्रिय टोलीमा स्थान नदिने कारण २०१५ को एउटा सेक्स टेप काण्डलाई बताइन्छ। उनी माथि त्यतिबेला माथेउ भाल्बुएनालाई ब्ल्याकमेल गर्न ब्ल्याकमेलरलाई सेक्स टेप उपलब्ध गराएको आरोप लागेको थियो। जसका कारण उनलाई २०१६ को युरो कपमा पनि टिममा स्थान दिइएको थिएन्।
यो काण्डको छानवीन अझै चलिरहेको छ। तर, बेन्जेमाले आफू दोषी नभएको प्रमाणित भइसक्दा पनि टिममा स्थान नदिएको भन्दै दुःख मनाउ गरेका छन्। बेन्जेमाको स्थानमा मोनाकाको प्रतिभाशाली खेलाडी केल्यान माबापेलाई स्थान दिइएको थियो।
