फ्रान्सले विश्व कप छनोटको अपराजित अभियानलाई कायम राखेको छ। युरोपको समूह ए तर्फको खेलमा लक्जेम्बर्गलाई उसैको घरमा फ्रान्सले ३–१ गोलले पराजित गर्यो।
फ्रान्सको जितमा जिरुड नायक बने। उनले २८ र ७७ मिनेटमा गोल गरेका थिए। अर्को गोल ग्रिजमनले गरे।
जिरुडले २८ मिनेटमा सिडिबेको क्रसमा डिबक्स भित्रबाट गोल गरेका थिए। तर, ३४ मिनेटमै लक्जेम्बर्गले खेललाई बराबरीमा ल्याएको थियो, जब माटुडीले डिबक्स भित्र फल खेले। लक्जेम्बर्गका लागि जोचिमले पेनाल्टीबाट गोल गरेका थिए।
फ्रान्सले पनि तीन मिनेटमै पेनाल्टीको अवसर पाएको थियो। ३७ मिनेटमा सिडिबेलाई लडाएको आरोपमा फ्रान्सले पेनाल्टीको मौका पाएपछि ग्रिजमनले गोल गरे।
पहिलो हाफमा फ्रान्सले २–१ को अग्रता बनाइसकेको थियो। जिरुडले दोस्रो हाफमा अर्को गोल हेडिङमार्फत थपेपछि फ्रान्सले जित सुनिश्चित पार्यो।
फ्रान्स हाल समूहमा १३ अंकका साथ शीर्षस्थानमा छ।
