कुलदीप यादव भारतको पहिलो चाइनामेन बलर बन्न पुगेका छन्। उनलाई शनिवारदेखि अस्ट्रेलियाविरुद्ध धर्मशालामा सुरु भएको चौथो तथा अन्तिम टेस्टमा भारतीय टेस्ट टोलीमा स्थान दिइएको हो।
कानपुरका २२ वर्षीय कुलदीप टेस्ट खेल्ने २ सय ८८ औं खेलाडी हुन्। चौथो टेस्टमा कुलदीपभन्दा पनि लेग ब्रेग गुगली बलर लक्ष्मण शिवारामाकृष्णनलाई दिने सम्भावना प्रबल थियो। तर, अन्तिम समय कुलदीपलाई मौका दिइयो।
कुलदीप भारतीय महाद्वीपमा दोस्रो चाइनामेन टेस्ट बलर हुन्। यसअघि श्रीलंकाले २०१६ मा लक्षण रंगिकालाई अस्ट्रेलियाविरुद्ध टेस्टमा उतारेको थियो। कुलदीपको सपना शेन वार्न जस्तै सफल बलर बन्ने छ।
उनलाई २२ प्रथम श्रेणीको खेल पछि नै छिटो टेस्ट टोलीमा स्थान दिइएको हो। उनले ८१ विकेट लिएका छ। इन्डियन प्रिमियर लिगमा उनी २०१२ मा पहिलो पल्ट मुम्बई इन्डियन्सबाट देखिएका थिए। यसपछि उनलाई कोलकाता नाइटराइडर्सले अनुबन्धित गरेको थियो।
सुनिल गावस्करले यसअघि नै कुलदीपको तारिफ गरिसकेका छन्। उनले आफू छनोट समितिमा भएको भए प्रथम श्रेणी क्रिकेट नखेल्दै उनलाई टेस्ट टिममा आफूले मौका दिने प्रतिक्रिया दिएका थिए।
कुलदीप भारतका महान ब्याट्सम्यान सचिन तेन्दुलकरलाई नेट्समा आउट गरेपछि चर्चामा आएका थिए। उनी अस्ट्रेलियाविरुद्ध युथ–१९ टिममा सहभागी भएर भारत फर्किने वित्तिकै मुम्बई इन्डियन्स टिमसँग जोडिएका थिए।
सचिनले नेट्समा उनको बल खेल्ने मन बनाए। नेट्समा पाँचवटा बल उनले साधारण चाइनामेन मात्र फ्याके। तर, छैटौ बल जुन उनले फ्याकेका थिए, सचिन पनि चकित परे। कुलदीपको त्यो बलमा सचिनको मिडल स्टम्प उडेको थियो।
उनको यो बलका लागि सचिनले कुलदीपलाई भनेका थिए, ‘राम्रो बोल्ड कुलदीप।’
