जियानलुइगी बुफोनले १ हजार खेल खेल्ने खेलाडी बन्न पुगेका छन्। विश्व कप छनोटअन्तर्गत युरोपको समूह जीअन्तर्गत अल्बानियाविरुद्धको खेलमा मैदानमा उत्रिएका ३९ वर्षीय बुफोनले यो सूचीलाई पुरा गरे।
१७ वर्षको उमेरमा इटालीको पार्मा क्लबबाट सुरु भएको बुफोनको गोलकिपरको यात्रा अहिले युभेन्ट्स क्लबमा आइपुग्दा इतिहास बन्न पुगेको छ। उनको अन्तर्राष्ट्रिय फुटबल सहभागिता १ सय ६८ पुगेको छ। जुन युरोपमा कुनै पनि खेलाडीले खेलेको सर्वाधिक खेल हो। यसअघि उनी स्पेनका गोलरक्षक इकेर कासिलास र लात्भियाका मिडफिल्डर भिटालिस आस्टाफेभ्ससँगै १ सय ६७ खेलको बराबरीमा थिए।
उनी विश्व फुटबलमा भने सर्वाधिक अन्तर्राष्ट्रिय खेल खेल्ने पाँचौ खेलाडी बन्न पुगेका छन्। उनले इक्वेडरका पूर्व डिफेन्डर इभान हुर्टाडोको बराबरी गरेका छन्। अन्तर्राष्ट्रिय फुटबलमा सर्वाधिक क्याप पाउने खेलाडीमा इजिफ्टका हमद हसन छन्। उनले १ सय ८४ खेल खेलेका छन्। यो कीर्तिमानभन्दा बुफोन १७ खेलले पछि छन्।
बुफोन सन् २००६ को विश्व विजेता इटालीको सदस्य पनि हुन्। उनले इटालियन सिरियाअन्तर्गत ६ सय १४ खेल खेलेका छन्। बुफोनको नाममा गोलकिपिङको थुप्रै कीर्तिमान छ। उनले १९९७ मा रुसविरुद्ध खेल्दै अन्तर्राष्ट्रिय फुटबलमा डेब्यु गरेका थिए।