स्पेनले विश्व कप छनोटअन्तर्गत समूह जीमा आफ्नो विजयी अभियानलाई जारी राखेको छ। घरेलु मैदान गिजोनमा शुक्रबार राती इजरायलविरुद्धको खेललाई ४–१ गोलले आफ्नो पक्षमा राख्दै स्पेनले समूहको शीर्षस्थानलाई यथावत राखेको छ।
यही समूहमा रहेको इटालीले पनि आफ्नो अपराजित यात्रालाई बराबरीमा राख्ने क्रममा अर्को खेलमा अल्बानियालाई २–० गोलले पराजित गर्यो।
दुवै टोली समूहमा समान १३ अंकमा छन् तर स्पेन बढि गोल गरेको आधारमा शीर्षस्थानमा छ।
रातीको खेलमा स्पेनको जितमा डेभिड सिल्भा, भिटोलो माचिन, डिएगो कोस्टा र इस्कोले गोल गरे। सिल्भाले पहिलो हाफको १३ मिनेटमा जोडी अल्बाको पासमा डिबक्स भित्रबाट गोल गरेका थिए। पहिलो हाफको खेल सकिन लाग्दा अतिरिक्त समयमा भटोलोले अर्को गोल थपे। उनको विश्व कप छनोटमा चौथो गोल थियो।
यसपालिको विश्व कप छनोटमा सर्वाधिक गोल भिटोलोले नै गरेका छन्। कोस्टाले ५१ र इस्कोले ८८ मिनेटमा गोल गरेका थिए। इजरायलका लागि एक मात्र गोल ७६ मिनेटमा लियोर राफेलोभले गरे।
इटालीको जितमा भने डानियल डे रोसीले १२ मिनेटमा पेनाल्टीमार्फत पहिलो गोल गरेका थिए। दोस्रो गोल लाजियो स्ट्राइकर किरो इमोबिलले ८० मिनेटमा गरे।
