लिओनल मेसीको पेनाल्टी गोलको सहयोगले चिलीलाई १–० ले पराजित गर्दै अर्जेन्टिना विश्व कप छनोटको तेस्रो स्थानमा उक्लिएको छ।
शुक्रबार बिहान भर्खरै सम्पन्न खेलमा १६ मिनेटमा बार्सिलोनाका अर्जेन्टिनी स्ट्राइकर मेसीको पेनाल्टी गोल घरेलु टोलीको जितका लागि पर्याप्त बन्यो।
खेलको पहिलो हाफमा पेरिस सेन्ट जर्मनीका मिडफिल्डर एन्जल डि मारियालाई डिबक्स भित्र लडाएको आरोपमा अर्जेन्टिनाले पेनाल्टीको अवसर पाएको थियो। जसलाई मेसीले गोलमा परिणत गरे।
दोस्रो हाफमा चिलीका स्ट्राइकर एलेक्सेस सान्चेज निकै खतरनाक देखिएका थिए। उनले ६४ मिनेटमा हानेको फ्रिकिक प्रहार अर्जेन्टिनाको गोल पोस्ट माथि लागेर फर्किएपछि घरेलु टोलीलाई राहत महसुस भएको थियो।
जितसँगै अर्जेन्टिना छैटौं स्थानबाट उक्लिएर तेस्रोमा पुगेको छ र विश्व कप छनोटबाट बाहिरिने दुर्घटनालाई टारेको छ।
शुक्रबार नै सम्पन्न दक्षिण अमेरिकी समूहको अर्को खेलमा पुछारको पाराग्वेले इक्वेडरलाई पराजित गरेपछि अर्जेन्टिना तेस्रो स्थानमा उक्लिएको हो। अर्जेन्टिनाको १३ खेलबाट २२ अंक छ। इक्वेडर भने २० अंकमै रोकियो।
यस्तै, बोलिभियालाई १–० ले पराजित गरेपछि कोलम्बिया पनि अर्जेन्टिनापछि चौथो स्थानमा उक्लिएको छ। कोलम्बियाको २१ अंक छ। चिली २० अंकका साथ छैटौं स्थानमा झरेको छ। ऊभन्दा राम्रो गोल अन्तरको आधारमा इक्वेडर पाँचौ स्थानमा छ।
विश्व कप छनोटअन्तर्गत दक्षिण अमेरिकी क्षेत्रको अझै ५ खेल हुन बाँकी छ। जसमा ब्राजिल ३० अंकका साथ शीर्ष स्थानमा छ। उरुग्वे २३ अंकले दोस्रो स्थानमा रहेको छ।
