इङ्लिस क्लब म्यानचेस्टर सिटीका प्रशिक्षक पेप ग्वार्डिओलाले विश्व फुटबलका उत्कृष्ट स्ट्राइकर अर्जेन्टिनाका लिओनल मेसीलाई बार्सिलोनाले बेच्ने कुरामा आफू ढुक्क रहेको बताएका छन्।
बेलायती अखबार सन्डे एक्सप्रेसले उनको भनाईलाई उध्रित गर्दै बार्सिलोनाले मेसीलाई बेच्ने कुरामा ग्वार्डिओला आश्वस्त रहेको दावी गरेको छ।
लामो समय बार्सिलोनाको प्रशिक्षक रहेका ग्वार्डिओला यसै सिजनदेखि म्यानचेस्टर सिटीको प्रशिक्षक नियुक्त भएका हुन्। उनी सिटीमा आएदेखि मेसीलाई क्लबमा भित्र्याउन भूमिका खेलिरहेका छन्। मेसीलाई महंगो मूल्यमा इङ्लिस क्लबमा भित्र्याउन यो सिजनपछि सिटीले क्लबका थुप्रै खेलाडीलाई बेच्ने सम्भावना छ। ग्वार्डिओलाले सिटीका १८ खेलाडीलाई बेच्ने सूचीमा राखेको हल्ला क्लबभित्र चलिसकेको छ।
बार्सिलोनामा मेसीको अनुबन्धको मिति अर्को सिजनको अन्त्यपछि समाप्त हुँदैछ। स्पेनिस क्लबले नेइमार र लुइस सुआरेजको अनुबन्धलाई नवीकरण गरेपनि मेसीको गरेको छैन्। हाल बार्सिलोनाबाट साताको ४ लाख पाउन्ड पारिश्रमिक लिएर खेलिरहेका मेसीको प्रस्ताव ६ लाख ५० हजार पाउन्ड रहेको छ।
तर, क्लबले आम्दानीको ७० प्रतिशत रकम मात्र खेलाडीको पारिश्रमिकमा खर्चिने भन्दै मेसीलाई यति ठूलो रकम दिन नसक्ने बताइसकेको छ।
मेसीको अनुबन्धका लागि म्यानचेस्टर सिटीले २० करोड पाउण्ड खर्चिने संकेत दिइसकेको सन्दर्भमा ग्वार्डिओलाले आफ्ना पूर्व खेलाडीलाई इङ्लिस क्लबमा भित्र्याउने सम्भावना देखेका छन्। ग्वार्डिओलाले बार्सिलोना छोडे पनि उनीहरुको सम्बन्ध घनिष्ट रहेको बताइन्छ।
मेसीले पहिरिने बार्सिलोनाको १० नम्बरको जर्सी विश्वमा सर्वाधिक बिक्रि हुने गरेको छ। म्यानचेस्टर सिटीले मेसी बार्सिलोना छोडेर आएको खण्डमा उनको जर्सीबाट हुने कमाइँलाई दुवै पक्षले लाभको रुपमा कसरी उपभोग गर्ने विषयमा समेत कुरा अगाडि चलाइरहेका छन्।