कर छलीको अभियोगमा आफूले ठूलो राहत पाएको जानकारी बार्सिलोनाका स्टार ब्राजिली स्ट्राइकर नेइमारले जानकारी दिएका छन्। ब्राजिलको कर विभागले उनको निवेदनलाई स्विकार गर्दै बक्यौता रकमलाई आधा गर्ने निर्णय गरेपछि नेइमारले राहत महसुस गरेका हुन्।
कर छलीको मुद्धामा ब्राजिलको कर विभागले नेइमार र उनको परिवारमाथि करिब ५ अर्ब ६३ करोड रुपैयाँ जरिवाना तोकेको थियो। नेइमारले जरिवाना रकम बढि भएको भन्दै पूर्नविचारका लागि निवेदन दिएका थिए। जसलाई स्विकार गर्दै विभागले करिब साढे २ अर्ब रुपैयाँ मात्र तिर्ने आदेश गत विहिबार दिएको छ।
ब्राजिलको सान्तोष क्लबबाट २०१३ मा स्पेनको बार्सिलोनामा अनुबन्धित हुँदा कर छली गरेको आरोमा नेइमार र उनको परिवारले स्पेनमा पनि मुद्धा खेपिरहेका छन्। नेइमारले आफ्नो छवीको लागि प्राप्त रकम राख्ने अधिकार परिवारमा मात्र निहित रहेको तर्क राखेका थिए।
कर विभागको यो निर्णयलाई कानुन व्यवसायीले वित्तीय अपराध मानेका छन्। र, यो निर्णयले कर छली गर्नेहरुलाई प्रोत्साहित गर्ने दावी गरेका छन्।
ब्राजिलबाट प्रकासित हुने पत्रिका फोल्हा साओ पाउलोका अनुसार गत विहिबार नेइमारलाई तोकिएको ब्राजिलको स्थानीय रुपैयाँ १ अर्ब ८ करोड ८० लाख रेयासलाई घटाएर आधा गर्ने निर्णय गरिएको हो। पत्रिकाले नेइमारको बुवा नेइमार सान्तोषको प्रतिक्रिया पनि सार्वजनिक गरेको छ। जसमा उनले भनेका छन्,‘भगवानको कृपाले हामीले मुद्धा जितेका छौं। हाम्रो घरेलु व्यवसायले कानुनी मान्यता पाएको छ।’
बार्सिलोनाले नेइमारलाई अनुबन्धित गर्दा ५ करोड ७१ लाख युरो खर्च गरेको र परिवारलाई थप ४ करोड युरो दिएको बताएको थियो। तर, स्पेनको कर अधिकारीले नेइमारलाई अनुबन्धित गर्दा मात्र ८ करोड ३० लाख युरो खर्चेको अनुमान गरेको छ।
