कप्तान स्टिभन स्मिथको अविजित १ सय ७८ रनको सहयोगले अस्ट्रेलियाले तेस्रो टेस्टको पहिलो इनिङमा ४ सय ५१ रन बनाएको छ।
रवीन्द्र जडेजाले ५ विकेट लिएपछि शुक्रबार दोस्रो दिन अस्ट्रेलियाको इनिङ साढे ४ सयमा समेटिएको थियो।
कप्तान स्मिथ भारतीय मैदानमा भारतविरुद्ध उच्च रन बनाउने पाँचौ व्याट्सम्यान बने। उनले एउटा इनिङबाट कङ्गारुको विकेट बचाउँदै घरेलु भारतलाई दबाबमा राखे। उनी भारतमा सर्वाधिक उच्च व्यक्तिगत रन बनाउने कप्तान पनि बनेका छन्। यसअघि पूर्व कप्तान माइकल क्लार्कले भारतविरुद्ध २०१३ मा चेन्नईमा १ सय ३० रन बनाएका थिए।
स्मिथले ग्लेन म्याक्सवेलसँग मिलेर पाँचौ विकेटका लागि १ सय ९१ रनको साझेदारी गरेका थिए। जसले भ्रमणकारी टोलीलाई ठूलो योगफलतर्फ लैजान मद्धत पुर्याएको थियो। यो साझेदारी अस्ट्रेलियाको भारतमा सबैभन्दा ठूलो हो। म्याक्सवेलले पनि टेस्टमा पहिलो सतक बनाउने क्रममा १ सय ४ रन बनाए।