म्यानचेस्टर युनाइटेड ३२ वर्षपछि युरोपा लिगको क्वाटरफाइनलमा प्रवेश गरेको छ। विहिबार राती (नेपाली समयअनुसार शुक्रबार बिहान) आफ्नो घरेलु मैदानमा सम्पन्न समूह १६ को दोस्रो लेगको खेलमा रुसी क्लब रोस्तोभलाई १–० ले पराजित गर्ने क्रममा दुवै लेगको नतिजा समग्रमा २–१ ले निकाल्दै म्यानचेस्टर क्वाटरफाइनल प्रवेश गरेको हो।
म्यानचेस्टरको जितमा हुँवा मार्टा नायक सावित भए। उनले ७१ मिनेटमा हेनरिक माखाटार्यानले डिबक्स भित्र निकालेको ‘लो पास’ लाई जाल्टन इब्राहिमोभिकले कुर्कुच्चाले मिलाएको अवस्थामा गोलमा परिणत गरेका थिए। उनको सिजनको दसौं गोल थियो।
म्यानचेस्टर यसअघि १९८५ मा यसैको पुरानो भर्सन युएफा कपको क्वाटरफाइनलमा प्रवेश गरेको थियो। त्यतिबेला रेड डेभिल्स क्वाटरफाइनलमा हंगेरीको भिडियोटनबाट पराजित भएको थियो।
आज दोस्रो हाफको सुरुवातमै आफ्नो महंगो मिडफिल्डर पाउल पोग्बालाई ४७ मिनेटमा चोटका कारण गुमाएको म्यानचेस्टरले केही समय सर्घष गर्नु पर्यो। अर्जेन्टिनी गोलरक्षक सर्जियो रोमेरोले केही सुन्दर बचाउ गरे।
म्यानचेस्टरले पहिलो लेगको खेलमा रुसी क्लबलाई उसैको घरमा १–१ गोलको बराबरीमा रोकेको थियो।
