दोस्रो हाफमा दुई गोलले पछाडि परेको अवस्थालाई उल्ट्याउदै रियल म्याड्रिडले ४ घण्टा अगाडि आफ्नो कट्टर प्रतिद्धन्द्धी बार्सिलोनासँग गुमाएको स्पेनिस ला लिगाको शीर्षस्थानलाई पुनः फर्काएको छ।
आइतबार रातीको दुई महत्वपूर्ण खेलमा बार्सिलोनाले सुरुमा २–१ गोलले एट्लेटिको म्याड्रिडलाई पराजित गर्दै ला लिगाको शीर्षस्थान ओगटेको थियो। तर, बार्सिलोनापछि मैदानमा उत्रिएको म्याड्रिडले घरेलु भिलारियाललाई ३–२ ले पराजित गर्दै क्याटलान क्लबबाट केही समयका लागि खोसिएको शीर्षस्थानको ताजलाई पुनः फर्कायो।
म्याड्रिडले अझै बार्सिलोनाभन्दा एक खेल कम खेलेको छ। म्याड्रिडले २३ खेलबाट ५५ अंक जुटाएको छ भने बार्सिलोनाको २४ खेलबाट ५४ अंकमा छ।
सोमबार बिहान साढे तीन बजे सकिएको म्याड्रिड र भिलारियालबीचको पहिलो हाफको खेल गोलरहित बराबरीमा टुँगिएको थियो। दोस्रो हाफको ११ मिनेटमा घरेलु भिलारियालले दुई गोल गरेपछि म्याड्रिड अफ्ठ्ेरो अवस्थामा देखिन्थ्यो।
भिलारियालका लागि ५० मिनेटमा ट्रिगुरोज मुनोजले पहिलो गोल गरेका थिए। दोस्रो गोल त्यसको ६ मिनेटपछि सेट्रिक बाकाम्बुले गरे।
घरेलु टोली ६३ मिनेटसम्म दुई गोलले अगाडि रहेको अवस्थालाई उल्टाउन गारेथ बेल, क्रिस्टियानो रोनाल्डो र अल्भारो मोराटाले १९ मिनेट भित्र तीन गोल फर्काए। यो नतिजाले भिलारियाललाई मात्र होइन, बार्सिलोनालाई पनि स्तब्ध पार्यो।
बेलले ६४ मिनेटमा डानी कार्भाजलको पासमा डिबक्सको ६ यार्ड भित्रबाट गोल गरेका थिए। दोस्रो गोल ७४ मिनेटमा रोनाल्डोले पेनाल्टीमार्फत फर्काए। टोनी क्रुजको प्रहार डिबक्सभित्र रहेका भिलारियालका खेलाडी ब्रुनोको हातमा लागेपछि रेफ्रिले म्याड्रिडलाई पेनाल्टीको अवसर प्रदान गरेको थियो। जुन पेनाल्टी रोनाल्डोले प्रहार गरेका थिए। उनले कुनै गल्ती नगरि सशक्त प्रहारमार्फत गोल गरेका थिए।
म्याड्रिडका लागि तेस्रो तथा निर्णायक गोल ८३ मिनेटमा मोराटाले गरे। करिम बेन्जेमाको स्थानमा उनी ७७ मिनेटमा अतिरिक्त खेलाडीको रुपमा मैदान प्रवेश गरेका थिए। उनले मैदान प्रवेश गरेको ६ मिनेटमै निर्णायक गोल गरे।
भिलारियालले रेफ्रिले दिएको पेनाल्टीको निर्णयमा आपत्ति जनाएपनि म्याड्रिड अन्ततः ३–२ ले विजयी भयो।