प्रिमियर लिग च्याम्पियन क्लब लेस्टर सिटीले आफ्नो प्रशिक्षक क्लाडियो रेनेरीलाई पदबाट बर्खास्त गरेको छ।
लेस्टरलाई इङ्लिस प्रिमियर लिगको उपाधि जिताएको ९ महिनापछि नै रेनेरीलाई हटाइएको हो। गत साल लेस्टरलाई अप्रत्यासित रुपमा उपाधि दिलाएका रेनेरीको नेतृत्वमा हाल क्लब रेलिगेशन जोनभन्दा एक अंकले मात्र माथि छ र क्लबले १३ खेल खेल्न बाँकी छ।
‘क्लब व्यवस्थापकले नेतृत्व परिवर्तन महसुस गर्यो, निर्णय दुखदायी भएपनि क्लब स्वार्थलाई अगाडि राख्दा यो आवश्यक छ,’ क्लबले जारी गरेको विज्ञप्तीमा भनिएको छ।
६५ वर्षीय रेनेरीलाई ‘फक्सेस’ ले च्याम्पियन्स लिगअन्तर्गत अन्तिम १६ को पहिलो लेगको खेलमा स्पेनिस क्लब सेभियासँग २–१ ले पराजित भएको २४ घण्टा नबित्दै हटाएको हो। लेस्टर १९३८ पछि उपाधि विजेताको रुपमा प्रिमियर लिगको रेलिगेशन उन्मुख छ।
लेस्टरले यस सिजन ५ खेल मात्र जितेको छ। १४ खेल हारिसकेको यो टोलीको कूल २१ अंक छ। जबकी २०१६ मा उपाधि जित्दा क्लबले १५ खेल जितेको थियो र ५३ अंक बटुलेर उपाधि हात पारेको थियो।
अर्को प्रशिक्षक नियुक्त नहुँदासम्म रेनेरीका सहायक क्रेग सेक्सपियरले प्रशिक्षणको जिम्मा सम्हाल्ने छन्।
