इङ्लिस प्रिमियर लिग च्याम्पियन क्लब लेस्टर सिटी च्याम्पियन्स लिगको समूह १६ को पहिलो लेगको खेलमा स्पेनिस क्लब सेभियाबाट २–१ ले पराजित भएको छ।
सेभियाको घरेलु रंगशालामा विहिबार बिहान सम्पन्न पहिलो लेगको खेलमा लेस्टरका गोलरक्षक कास्मेर स्माइकलले घरेलु टोलीको पेनाल्टी सुरुमै रोके पनि पराजयलाई टार्न सकेनन्। पाब्लो सराबिया र जोयाक्युन कोरियाको गोलमा सेभियाले सुरुमै दुई गोलको अग्रता बनाएको थियो।
सराबियाले २५ र अर्जेन्टिनी स्ट्राइकर कोरियाले ६२ मिनेटमा गोल गरेका थिए। १३ मिनेटमा मारियानोलाई डिबक्स भित्र लडाएको आरोपमा सेभियाले पेनाल्टीको अवसर पाएको थियो। त्यो पेनाल्टी हान्न अर्जेन्टिनी स्ट्राइकर कोरिया आएका थिए। तर, उनको पेनाल्टीलाई लेस्टरका गोलरक्षकले सुरुमै रोकेका थिए।
च्याम्पियन्स लिगमा ‘डेब्यु’ गरिरहेका इङ्लिस टोलीका लागि एक मात्र गोल जामी भर्डीले गरे। उनले ७३ मिनेटमा गोल फर्काएका थिए। भर्डीको यो गोलपछि लेस्टरको च्याम्पियन्स लिगमा यथावत रहने सम्भावना बनेको छ। इङ्लिस टोलीले मार्च १४ मा आफ्नो घरेलु मैदानमा सेभियाको आतिथ्य गर्नेछ। यसै खेलबाट क्वाटरफाइनल पुग्ने टिमको छिनोफानो हुनेछ।
