स्पेनिस ला लिगाको शीर्षस्थानमा रहेको रियल म्याड्रिडलाई रेलिगेशन जोनतर्फ रहेको भेलेन्सियाले आफ्नो घरेलु मैदानमा २–१ गोलले स्तब्ध पारेको छ।
विहिबार बिहान सम्पन्न खेलमा लिगको चौधौं स्थानमा रहेको भेलेन्सियाले १० मिनेटभित्रै म्याड्रिडविरूद्ध २ गोल गरिसकेको थियो। स्टार स्ट्राइकर क्रिस्टियानो रोनाल्डोले ४४ मिनेटमा हेडिङ गोल गर्दै खेलमा फर्किने प्रयास गरेका थिए।
तर, दोस्रो हाफपछि प्राप्त केही मौकालाई सदूपयोग गर्न नसक्दा म्याड्रिडको खेलमा फर्किने योजना भताभूङ भएको थियो। प्रशिक्षक जिनेदिन जिदानले ६२ मिनेटमा अतिरिक्त खेलाडीको रुपमा गारेथ बेललाई प्रवेश गराएर रोनाल्डो, करिम बेन्जेमा र वेल्स स्ट्राइकरबाट एकैपल्ट भेलेन्सियाको गोल पोस्टमा आक्रमण बुन्न लगाएका थिए। तर, त्यो प्रयास पनि सफल हुन सकेन।
भेलेन्सियाका लागि पहिलो गोल सिमोन जाजाले ४ मिनेटमा गरेका थिए। फाबियान ओरेलानाले ९ मिनेटमा अर्को गोल थपेपछि म्याड्रिड पहिले देखि नै पछाडि पर्यो।
यो नतिजापछि बार्सिलोनाले केही राहत महसुस गरेको छ। बार्सिलोनाले उपाधिको होडमा म्याड्रिडसँगको दूरीलाई निकै कम गरेको छ। अब बार्सिलोना एक खेल ज्यादा खेलेर म्याड्रिडभन्दा १ अंकले मात्र पछाडि परेको छ।
म्याड्रिडको २२ खेलबाट ५२ अंक छ भने बार्सिलोनाले २३ खेलबाट ५१ अंक जुटाएको छ।
