इङ्लिस प्रिमियर लिगमा राम्रो प्रदर्शन गर्न नसकेर आलोचना खेपिरहेका प्रशिक्षक जोसे माउरिन्होले केही हदसम्म राहत महसुस गरेका छन्। युरोपा लिगअन्तर्गत विहिबार बिहान सवा एक बजे सकिएको समूह–३२ को दोस्रो लेगको खेलमा पनि म्यानचेस्टर युनाइटेड १–० ले विजयी भएको छ।
फ्रान्सको सेन्ट इटिन क्लबलाई उसैको घरेलु मैदानमा दस खेलाडीमा सिमित इङ्लिस क्लबले १–० ले पराजित गरेपछि समग्रमा ४–० गोलको अन्तर निकाल्दै म्यानचेस्टर समूह–१६ मा प्रवेश गरेको छ।
६ दिनअघि ओल्ड ट्राफोडमा भएको खेलमा जाल्टन इब्राहिमोभिकको हयाट्रिकको मद्धतले म्यानचेस्टरले ३–० को नतिजा निकालेको थियो। दोस्रो लेगमा भ्रमणकारी म्यानचेस्टरलाई विजय दिलाउन मिडफिल्डर हेनरिक मखिटारियनले १६ मिनेटमा गोल गरेका थिए। २३ मिनेटमा हयामस्ट्रिङको समस्या देखिएपछि उनले मैदान छोडेका थिए।
उनको स्थानमा माउरिन्होले मार्कुस रसफोर्डलाई मैदानमा प्रवेश गराएका थिए। दोस्रो हाफको ६३ मिनेटमा इरिक बेलीले रातो कार्ड पाएपछि म्यानचेस्टरले २७ मिनेट १० खेलाडीमा सिमित रहेर खेल्नु परेको थियो।
