न्युजिल्यान्डले दक्षिण अफ्रिकाको १२ खेलको अविजित यात्रामा पूर्ण विराम लगाएको छ। बुधबार दोस्रो एकदिवसीयमा अफ्रिकालाई ६ रनले पराजित गरेको किवी टोलीले ५ एकदिवसीयको शृंखलालाई १–१ को बराबरीमा राखेको हो।
दक्षिण अफ्रिका गत जुनदेखि एकदिवसीयमा पराजित भएको थिएन। बुधबारको खेल जितेको भए अफ्रिकाले अस्ट्रेलियापछि लगातार सर्वाधिक एकदिवसीय जित्ने इतिहास कायम गर्ने थियो। सन् २००३ मा अस्ट्रेलियाले लगातार २१ खेल जितेको थियो।
१२ खेलमा अपराजित रहने कीर्तिमानलाई अफ्रिकाले दुई पल्ट दोहर्याएको थियो। २००५ मा पनि अफ्रिकाले लगातार १२ खेल जितेको थियो। अफ्रिकाबाहेक पाकिस्तानले पनि २००७–०८ को बीचमा १२ खेल नै जितेको थियो।
दोस्रो एकदिवसीयमा न्युजिल्यान्डले ४ विकेटको क्षतिमा बनाएको २ सय ८९ रनको उत्तरमा अफ्रिकाले ९ विकेट गुमाएर २ सय ८३ रन मात्र जोड्न सकेको थियो। किवीका लागि ट्रेन बोल्टले ३ विकेट लिएका थिए। यसअघि रोस टेलरले १ सय २ रनको सतकीय इनिङ खेलेका थिए।
