नेपाल ओलम्पिक कमिटीको वैधानिकताको विषयमा तीन वर्षअघि सर्वोच्च अदालतले गरेको निर्णय कार्यान्वयनका लागि पहिलो पटक ललितपुर जिल्ला प्रशासन कार्यालय (सिडियो) ले सम्बन्धित निकायलाई पत्र काटेको छ।
सोमबार बिहान कार्यालय खुल्ने वित्तिकै ललितपुर सिडियो दीपक काफ्लेले ललितपुर जिल्ला प्रहरी कार्यालयलाई सर्वोच्चको निर्णय कार्यान्वयन गर्न आदेश दिएको हो।
सिडियोको आदेशपछि सर्वोच्चले तीन वर्षअघि रुक्मशमशेर राणाको कमिटीलाई दिएको वैधानिकता स्थापित हुने आशा पलाएको छ।
२०६४ सालमा नेपाल ओलम्पिक कमिटीको बैधानिकताको विषयलाई लिएर पहिलो पल्ट सर्वोच्च अदालतमा मुद्दा परेको थियो। जसमा तीन वर्षअघि सर्वोच्चले देशमा रुक्मशमशेर राणा अध्यक्ष भएको ओलम्पिक कमिटी मात्र वैधानिक भएको निर्णय सुनाएको थियो।
‘हामीले आज सिडियो कार्यालयबाट पत्र पाएका छौं। कसरी अगाडि बढ्ने भन्ने कुरामा सबैसँग सरसल्लाह गर्नेछौं,’ रुक्मशमशेरले सेतोपाटीसँग भने। यसअघि देशभित्र मान्यता नभए पनि नेपाल ओलम्पिक कमिटीको अध्यक्षको हैसियतले जीवनराम श्रेष्ठले काम गर्दै आइरहेका थिए।