राष्ट्रपति रनिङ शिल्ड २०७३ अन्तरगत बुधबारदेखि चितवन क्षेत्र नम्बर तीनको प्रतियोगिता सुरु भएको छ। जिल्ला खेलकुद विकास समिति चितवनको आयोजनामा भएको प्रतियोगिताको एक कार्यक्रमका बीच चितवनका स्थानीय विकास अधिकारी श्रवणकुमार पोखरेलले उद्घाटन गरे। प्रतियोगिताको पहिलो दिन भएको १५ सय मिटर दौडको छात्र तर्फको प्रतिस्पर्धामा नारायणी नमुना माविका उपेन्द्र खत्री प्रथम भए भने चितवन माविका कुमार श्रेष्ठ द्वितीय तथा लक्ष्मी माविका विवेक वराली तृतीय भए।
त्यस्तै १५ सय मिटर दौडको छात्रा तर्फको स्पर्धामा वालकुमार माविकी ज्योती लामा, लक्ष्मी माविकी शुशीला रानामगर, श्री माविकी लिला खड्का क्रमशः प्रथम, द्धितिय र तृतिय
भइन्।
छात्र चार सय मिटर दौडमा चितवन माविका रामजी गिरी प्रथम हुँदा भरतपुर माविका प्रदिप वर्तौला द्वितीय र वाल्मिकी शिक्षा सदनका कृष्ण आचार्यले तृतीय स्थान हासिल गरे। सोही दौडमा छात्रतर्फ लक्ष्मी माविकी रिहाना खातुन प्रथम, चितवन
माविकी अस्मिता अधिकारी द्वितीय र मनु भण्डारी तृतीय भए।
बुधबार भलिबल, कबड्डी र लङजम्पमा प्रतिस्पर्धा भएको छ। भलिबल र कबड्डीको सेमीफाईनल र फाईनल बिहीबार हुने छ। तीन नम्बर क्षेत्रका १२ वटा विद्यालय प्रतियोगितामा सहभागी छन्।
क्षेत्रीय स्तरका प्रतियोगिताबाट विजयी भएका विद्यालय तथा खेलाडीहरुले जिल्लास्तरमा हुने प्रतियोगितमा प्रतिस्पर्धा गर्न पाउने छन्। सो प्रतिस्पर्धामा टिम प्रथम हुनेले नगद ७५ हजार र ट्रफी तथा द्वितीय हुनेले नगद ५० हजार र ट्रफी प्राप्त गर्ने जिल्ला खेलकुद विकास समिति चितवनका कोषाध्यक्ष केशव आचार्यले जानकारी दिए।