आर्मीलाई हराउँदै नेपाल पुलिस च्याम्पियन (तस्बिरहरू)

अनिश रेग्मी

नेपाल पुलिस क्लबले आर्मीलाई हराउँदै रूस्लान कपको उपाधि जितेको छ। त्रिभुवन विश्वविद्यालय क्रिकेट मैदानमा मंगलबार सम्पन्न फाइनलमा पुलिसले नेपाल आर्मीलार्इ ४ विकेटले पराजित गर्दै उपाधिमाथि कब्जा जमाएको हो।

टस हारेर पहिले ब्याटिङ गरेको नेपाल आर्मीले निर्धारित २० ओभरको खेलमा ६ विकेट गुमाउँदै १ सय ४२ रन बनायो। आर्मीका लागि कप्तान विनोद भण्डारीले सर्वाधिक ४० रन जोडेका थिए। यस्तै, राजेश पुलामी ३८, नरेश बुढा ऐर २८, अनिल मण्डलले १५ तथा सोमपाल कामीले नटआउट १५ रन जोडे।

पुलिसका ललितसिंह भण्डारी र कुशल भूर्तेलले समान २-२ विकेट लिए। मञ्जित श्रेष्ठ र ललित राजवंशीले समान १ विकेट हात पारे। मध्यम स्कोर पछ्याएको पुलिसले १ सय ४३ रनको लक्ष्य १९ ओभरमा ६ विकेट गुमाउँदै भेट्टायो। पुलिसका दीपेन्द्रसिंह ऐरीले सर्वाधिक ४२ तथा कुशल भूर्तेलले नटआउट ३४ रनको योगदान दिए।

त्यस्तै पुलिसका दिलीप नाथले २४ र योगेन्द्रसिंह कार्कीले ११ रन जोड्दै पुलिसलार्इ च्याम्पियन बनाए। पुलिसका सिद्धान्त लोहनीले १९औं ओभरको अन्तिम बलमा विजयी छक्का प्रहार गरेका थिए। आर्मीका लागि जितेन्द्र मुखिया र विक्रम सोएबले २-२ विकेट लिएका थिए।

उपाधिसँगै पुलिसले तीन लाख हात पारेको छ भने उपबिजेता बनेको नेपाल आर्मीले दुई लाख रूपैयामा चित्त बुझाएको छ।