देशको एक मात्र अन्तर्राष्ट्रिय क्रिकेट मैदानमा तरकारी खेती

अनिश रेग्मी

कीर्तिपुरस्थित त्रिभुवन विश्वविद्यालयमा अवस्थित अन्तर्राष्ट्रिय क्रिकेट मैदान खेलकुद विकासको ठेक्का लिएका पदाधिकारीको चरम लापरवाहीका कारण तरकारी खेतीमा परिवर्तन हुन थालेको छ।

सन् १९९६ मा नेपालले अन्तर्राष्ट्रिय क्रिकेटको मान्यता पाएपछि कीर्तिपुर मैदानलाई अन्तर्राष्ट्रिय क्रिकेट मैदानको रुपमा निमार्ण गर्न नेपाल क्रिकेट संघ (क्यान) को तत्कालिन नेतृत्वले त्रिभुवन विश्वविद्यालयसँग सम्झौता गरेको थियो।

यही मैदानले विगतमा नेपालमा आयोजना हुने अन्तर्राष्ट्रिय क्रिकेट प्रतियोगिताको भार एक्लै थेक्दै आइरहेको थियो। सन् १९९९ मा विश्व चर्चित खेलाडीहरू सम्मिलित टेम्पो लेजेन्ड कपको आयोजना गरेर अन्तर्राष्ट्रिय क्रिकेटमा वाहवाही लुटेको कीर्तिपुरको यही मैदान अहिले चरम लापरवाहीका कारण तरकारी खेतीमा बदलिदै गइरहेको छ।

नेकपा एमालेको नेतृत्वमा रहेको तत्कालिन युवा तथा खेलकुद मन्त्रालय तथा हाल राष्ट्रिय खेलकुद परिषद्को चरम राजनीतिका कारण अहिले नेपालमा तीन वटा क्यान अस्तित्वमा छ। नेपाली क्रिकेटमा बढ्दो राजनीतिकै कारण अन्तर्राष्ट्रिय क्रिकेट महासंघ (आइसिसी) ले गत वर्षदेखि नेपाललाई प्रतिबन्ध लगाएको छ।

त्यसैले नेपाल अहिले राष्ट्रको झन्डामुनी नभई आइसिसीको ब्यानरमुनी अन्तर्राष्ट्रिय प्रतियोगिता खेल्दै आइरहेको छ। क्रिकेटको विकासको नाममा क्यानमा पदाधिकारी बन्न आउने, माखो पनि नमार्ने तर विदेश घुम्नुपर्ने प्रवृत्तिका कारण देशको एक मात्र अन्तर्राष्ट्रिय क्रिकेट मैदानको अवस्था यस्तो भएको हो। यही मैदानमा अहिले राष्ट्रिय स्तरका अधिकांश प्रतियोगिता हुन्छन्।

हेर्नुहोस् तस्बिरहरू

प्रकाशित मिति: 2017-01-17 12:09:49

प्रतिक्रिया दिनुहोस्