खेलको अन्तिम समयमा सर्जिओ रामोसले गोल गरेपछि रियल मड्रिडले स्पेनिस ला लिगा फुटबलमा ३५ खेलमा अपराजित हुँदै नयाँ रेकर्ड बनाएको छ। क्रिष्टियानो रोनाल्डोलाई आराम दिएको रियल मड्रिड एक समय खेलमा २–१ ले पछि पारेके थियो । तर, उत्कृष्ट पुनरागमन गर्न सफल भएको हो।
शनिबार राति घरेलु मैदान बर्नाबेउमा भएको खेलमा अन्तिमको ६ मिनेट बाँकी हुँदासम्म डिप्रोटिभो डि ला कोरुनासँग २–१ ले पछि परेको रियल मड्रिडलाई जिताउन रामोसको गोल महत्वपूर्ण रह्यो ।
पहिलो हाफमा गोलरहित बराबरी खेलेको रियलको लागि ५० औं मिनेटमा अल्भारो मोराटाले गोल गर्दै सुरुवाति अग्रता दिलाए । त्यसपछि डिप्रोटिभोका लागि जोसेलुले ६३ र ६५ औं मिनेटमा गोल गर्दै २–१ अग्रता दिलाए । यो खेलमा रोनाल्डोलाई आराम दिइएको थियो । उनी मैदान छिरे लगतै ८४ औं मिनेटमा मारिएनोले रियलका लागि बराबरी गोल फर्काए । खेलको इन्जुरी समयमा रामोसले सुन्दर गोल गर्दै रियललाई ३–२ को महत्वपूर्ण जित दिलाए।
यो जितसँगै मड्रिडले ३५ खेलसम्म अपराजित रहेको नयाँ रेकर्ड बनाएको छ।
जितपछि शीर्ष स्थानको रियल मड्रिडको १५ खेलबाट ३७ अंक भएको छ। यस्तै दोस्रो स्थानमा रहेको बार्सिलोना ६ अंकले पछि छ ।
