क्लब फुटबलका सफल प्रशिक्षक पेप ग्वार्डिओला बुधबार राती बार्सिलोनाको घरेलु नोउ क्याम्प मैदानमा उत्रिँदा भिन्न भूमिकामा देखिनेछन्। बार्सिलोनालाई सबैभन्दा सफल क्लबको रुपमा स्थापित गर्न उनको भूमिका निकै महत्वपूर्ण मानिन्छ। अहिले बार्सिलोनाको तीन खतरनाक स्ट्राइकरको भूमिकामा अर्जेन्टिनाका लिओनल मेसी, उरुग्वेका लुइस सुआरेज र ब्राजिलका नेइमारलाई स्थापित गराउने प्रशिक्षक पनि उनी नै हुन्।
तर, बुधबार राती साढे १२ बजे बार्सिलोना आफ्नो घरेलु मैदानमा उत्रिँदा उनी विपक्षी टोलीको प्रशिक्षकको भूमिकामा देखा पर्र्दैछन्। अर्थात् आफूले जन्माएका तीन खतरनाक स्ट्राइकरलाई रोक्न मात्र होइन, बुधबार बार्सिलोनालाई उसैको घरमा हराउने उनको योजना हुनेछ।
च्याम्पियन्स लिगअन्तर्गत इङ्लिस क्लब म्यानचेस्टर सिटी र बार्सिलोनाको खेल राती हुँदैछ। ग्वार्डिओलाले सिटीको प्रशिक्षकको रुपमा पहिलो पल्ट आफ्नो पूर्व क्लबविरूद्ध उल्टो रणनीति बनाउँदै छन्। कुनैबेला सिटीको पोस्टमा गोल हान्ने रणनीति बुन्ने गरेका ग्वार्डिओला राती कसरी बार्सिलोनालाई रोक्ने भन्ने अभियानमा हुनेछन्। ग्वार्डिओलाको आफ्नो पूर्व क्लबविरूद्ध यो नै पहिलो खेल भने होइन। जर्मनी बुन्डेसलिगा क्लबमा हुँदा उनले २ पल्ट बार्सिलोनाविरूद्ध रणनीति बुनेका थिए। जसमा उनी खासै सफल हुन सकेका थिएनन्।
तर, यसै वर्ष इङ्लिस क्लबमा अनुबन्धित भएका ग्वार्डिओलाको प्रशिक्षण असरदार देखिएको छ। सिटी प्रिमियर लिगको शीर्षस्थानमा छ। बार्सिलोना प्रशिक्षक लुइस इनरिकले पनि ग्वार्डिओलाको खुलेर प्रसंसा गरेका छन्। उनले वर्तमान अवस्थामा ग्वार्डिओला उत्कृष्ट प्रशिक्षक भएको बताएका छन्। च्याम्पियन्स लिगमा बार्सिलोना सबै खेल जितेर शीर्षस्थानमा छ। तर, सेल्टीकसँग पछिल्लो खेलमा ३–३ गोलको बराबरी खेलेको सिटीका लागि रातीको खेल निकै महत्वपूर्ण मानिन्छ।
अहिले बार्सिलोनामा गोलकिपर जास्पर सिलेसानबाहेक सबै खेलाडी पूर्ण स्वास्थ्य छन्। ग्वार्डिओला भने आफ्नो फुल–ब्याक बाकारे सान्गा र मिडफिल्डर फाबियान डेल्पको अनुपस्थितिमा उत्रिने छन्। तर, उनको लागि खुसीको खबर भनेको प्रभावशाली दुई खेलाडी केभिन डे ब्रुयान र भिन्सेन्ट कोम्पानी टोलीमा फर्किएका छन्। यी दुवै गत साता इभर्टनको खेलपछि मैदानमा फर्किन लागेका हुन्। मेसीको पुनरागमनले बार्सिलोना टिममा उत्साह थपिएको छ। चोटका कारण तीन साता मैदान बाहिर रहेका मेसी यसै साता टोलीमा फर्किएका हुन्।
उनको उपस्थितिलाई लिएर विपक्षी टोलीका प्रशिक्षक डराउने गर्दछन् तर, ग्वार्डिओलाले मेसीको आगमनबाट आफू खुसी भएको बताएका छन्। ‘उनलाई खेलिरहेको हेर्दा मलाई खुसी लाग्छ। उनी पुनः स्वाथ्य छन्, मलाई खुसी लागिरहेको छ,’ ग्वार्डिओलाले भने–‘मलाई थाहा छ, बार्सिलोना विश्वकै उत्कृष्ट टिम हो।’