भारतीय क्रिकेट बोर्ड (बिसिसीआई) का अध्यक्ष अनुराग ठाकुरले नेपाल क्रिकेट संघ (क्यान) मा भएको राजनीतिक हस्तक्षेपको विषयमा आवाज उठाउने भएका छन्।
गत साता श्रीलंकाको राजधानी कोलम्बोमा एसियाली क्रिकेट महासंघ (एसिसी) लाई पुनः व्युँत्याएर भारत फर्किएका ठाकुरले यस्तो धारणा राखेका हुन्। उनले संघमाथि हुने गरेको बाहिरी (राजनीतिक) हस्तक्षेपलाई निस्तेज पार्न संयुक्त अवधारणा बन्नु पर्ने बताएका छन्।
बिसिसीआईको सेप्टेम्बर २१ मा हुने वार्षिक साधारण सभामा राजनीतिक हस्तक्षेपको मुद्धा पनि उठ्ने बताइएको छ। नेपालमा मात्र होइन, भारत र श्रीलंकामा पनि राजनीतिक हस्तक्षेपका कारण बेलाबेलामा क्रिकेट गतिविधि अवरुद्ध हुँदै आइरहेको छ।
गत वर्ष नेपालमा भएको क्यानको निर्वाचनलाई राष्ट्रिय खेलकुद परिषद् (राखेप) ले मान्यता नदिई छुट्टै तदर्थ कमिटी गठन गरेको थियो। जसकारण नेपालमा विवाद उत्पन्न हुँदा अन्तर्राष्ट्रिय क्रिकेट महासंघ (आइसिसी) ले ४ महिनाअघि क्यानलाई प्रतिबन्ध लगाउने निर्णय गरेको थियो।
नेपाली क्रिकेटलाई लगाइएको प्रतिबन्धको विषय गत साता कोलम्बोमा बसेको एसिसीको साधारण सभामा महत्वका साथ उठेको थियो। यतिबेलै ठाकुरले नेपालको विषयमा आइसिसीमा कुरा उठाउने बताएका थिए।
आइसिसीमा भारतको पक्ष जहिले पनि बलियो रहँदै आइरहेको छ। उनले गत मंगलबार भारतीय पत्रकारलाई जानकारी दिँदै भने– ‘एसिसीको भर्खरै सम्पन्न बैठकमा नेपाल, श्रीलंका र भारतीय क्रिकेटमाथि भइरहेको बाहिरी हस्तक्षेपको विषयमा चासो उत्पन्न भएको थियो। एसिसीमा हस्तक्षेपलाई रोक्न के–के गर्न सकिन्छ भनेर सल्लाह पनि गरेका थियौं।’
एसिसीको बैठकमा श्रीलंकाली क्रिकेट संघका अध्यक्ष थिलंगा सुमाथिपालाले नेपाली क्रिकेटमा देखिएको राजनीतिक हस्तक्षेपलाई रोक्न एसियाका सबै राष्ट्रले आवाज उठाउनु पर्ने बताएका थिए। १६ राष्ट्र सहभागी बैठकले पाकिस्तानका सहरियार खानलाई एसिसीको अध्यक्षमा नियुक्त गरेको थियो। यो बैठकमा भाग लिने नेपालबाट निर्वाचित क्यानका अध्यक्ष चतुरबहादुर चन्द र महासचिव अशोकनाथ प्याकुरेल कोलम्बो गएका थिए।
