पराजयमा नयाँ कीर्तिमान बनाएको अस्ट्रेलियालाई आफ्नो घरेलु मैदानमा श्रीलंकाले १ सय ६ रनले हराएको छ। जीतका लागि २ सय ६८ रनको लक्ष्य पछ्याइरहेको भ्रमणकारी कङ्गारु टोलीलाई १ सय ६१ रनमै रोक्न सफल भएपछि श्रीलंकाले अस्ट्रेलियाविरूद्ध घरमा दोस्रो टेष्टको इतिहास रचेको छ।
सन् १९९९ को केन्डी टेष्टमा अरविन्द डि सिल्भा, अर्जुना रनातुङ्गा, सनथ जयसूर्या, महेला जयबद्र्धने, मुथैया मुरलीधरन र चमिन्दा भाषजस्ता हस्तिहरूको उपस्थितिमा अन्तिम पल्ट श्रीलंकाले टेष्ट जितेको थियो।
अस्ट्रेलियालाई हराउन श्रीलंकन स्पिनरले उत्कृष्ट प्रदर्शन गरे। जसमा रंगना हर्थाको प्रभाव बढी थियो। दोस्रो इनिङमा ५४ रन खर्चेर ५ विकेट लिएका हर्थाको कसिलो बलिङका कारण अस्ट्रेलियाले १ सय ५४ बल खेल्दा समेत एक रन जोड्न सकेन्।
टेष्टको नम्बर १ टोलीको रूपमा रहेको अस्ट्रेलियाले पहिलो इनिङमा ८६ रनको अग्रता बनाएको थियो। तर, कुसल मेन्डिजले आफ्नो पहिलो टेष्ट सतकको रूपमा १ सय ७६ रन बनाएपछि घरेलु टोली बलियो अवस्थामा देखिएको थियो। पालेकेले रंगशालामा कुनै पनि ब्याट्सम्यानले बनाएको यो सर्वाधिक उच्च योगफल हो। उनी अस्ट्रेलियाविरूद्ध उच्च व्यक्तिगत योगफल बनाउने पूर्व कप्तान कुमार संगाकारापछि दोस्रो ब्याट्सम्यान पनि बन्न पुगेका छन्। एउटै इनिङमा १ सय ५० भन्दा उच्च रन बनाउने उनी श्रीलंकाका सवैभन्दा कान्छा ब्याट्सम्यान पनि बन्न पुगे।
अस्ट्रेलियाका कप्तान स्टिभ स्मिथले ५५ रन बनाए। पुछारका स्टिभ ओकेफे र पिटर नेभिलले १ सय ७८ बल खेल्ने क्रममा ४ रन मात्र जोडेपछि भ्रमणकारी टोलीको अवस्था दयनीय बन्न पुगेको थियो। तीनवटा टेष्टको श्रृंखलाअन्तर्गत दोस्रो टेष्ट आउँदो बिहिबारदेखि सुरु हुनेछ।
यसअघि पहिलो इनिङमा श्रीलंकाले बनाएको १ सय १७ रन पछ्याउने क्रममा अस्ट्रेलियाले २ सय ३ रन बनाएको थियो। दोस्रो इनिङमा श्रीलंकाले ३ सय ५३ रन बनायो। उत्तरमा अस्ट्रेलिया १ सय ६१ मा अलआउट भयो। पुरै खेलमा १५ ब्याट्सम्यान एलबीडब्लुको सिकार बने।