डिफेन्डिङ च्याम्पियन स्पेनलाई हराउँदै इटाली फ्रान्समा जारी युरो २०१६ को क्वार्टरफाइनलमा प्रवेश गरेको छ।
प्रि-क्वार्टरफाइनलमा बलियो टोली स्पेनलाई २-० गोल अन्तरले हराउँदै इटाली अन्तिम आठमा प्रवेश गरेको हो।
यसअघि सन् २०१२ को युरोकप फाइनलमा स्पेनले इटालीलाई ४–० ले हराएर उपाधि जितेको थियो । अघिल्ला दुई संस्करणमा उपाधि उचालेको स्पेनलाई यसपटक अन्तिम १६ बाटै घर फर्कनुपर्यो।
अघिल्लो पटक फाइनलमा हारेर उपविजेतामा सीमित बन्नु पर्दाको पीडाको बदला लिने क्रममा इटालीका लागि खेलको ३३ औँ मिनेटमा जर्जियो चिलिनीले पहिलो गोल गरे। दोस्रो गोल खेलको इन्जुरी समयमा ग्राजियानो पेलेले गरेका हुन्।
पहिलो हाफमा एक सून्यको अग्रता लिएको इटालीले इन्जुरी समयमा अर्को गोल थपेर प्रतियोगितामा बलियो दाबेदारी प्रस्तुत गर्यो।
यसअघि समूह चरणमा दुई खेलमा जित र एकमा हारेका दुवै टिमले समान ६ अंक जोडेर अन्तिम १६ मा आएका हुन्। स्पेनको लगातार १४ खेलको अपराजित यात्रा समूह चरणमा क्रोएसियासँग हारेपछि टुंगिएको थियो।
सन् २०११ को अगस्टमा भएको मैत्रीपूर्ण खेलमा इटालीले स्पेनलाई २–१ ले हराएको थियो । त्यसअघिका पाँच खेलमा इटालीले स्पेनलाई हराउन सकेको थिएन । दुई खेलमा स्पनेसँग हारेको थियो भने तीन खेलमा बराबरी भएको थियो ।
इटालीको युरोकपमा नवौं सहभागिता हो । सन् १९९६ र २००४ बाहेक इटाली नकआउट चरणमा प्रवेश गरेको छ । सन् १९६८ मा युरोकपको उपाधि जितेको इटाली सन् २००० र २०१२ मा उपविजेता बन्यो ।
अब इटालीले क्वाटरफाइनलमा जर्मनीसँग खेल्नेछ।