नायजेरियन खेलाडी भिक्टरको ह्याटि्रकसँगै नेप्लिज फुटबल एसोसिएसन हङकङले तेस्रो सफल पोखरा कपमा क्वाटरफाईनलको यात्रा तय गरेको छ। पोखरा रंगशालामा आज भएको खेलमा १६ वर्ष मुनीको नेपाली राष्ट्रिय टिमलाई ३–० ले हराउँदै पाहुना टोलीले क्वाटरफाईनलमा अर्को पाहुना टोली भुटानसँगको भेट पक्का गरेको हो।
हङकङको जितमा भिक्टरले १६, ७७ र ८९ औं मिनेटमा गोल गर्दै प्रतियोगितामै पहिलो ह्याटि्रक गरे। नाईजेरियन र अफ्रिकन ५ खेलाडीसहित मैदान उत्रिएको हङकङको सामु नेपाली युवा खेलाडीले पाएको अवसर पनि सदुपयोग गर्न नसक्दा पहिलो चरणबाटै वाहिरियो। पहिलो हाफ एक गोलले पछि परेको नेपाल बिरुद्ध हङकङले दोस्रो हाफमा २ गोल थप्यो।
खेलको २७ औं मिनेटमा विकास थापाले पाएको राम्रो अबसर गुमाए भने ३० औ मिनेटमा किरण सुनारले वान भर्सेन वान बलको सदुपयोग गर्न नसक्दा पोखरा रंगशालामा उपस्थित सयौ दर्शक निरास भएका थिए। ८७ औं मिनेटमा बिमल घर्तिमगरको शसक्त प्रहार हङकङका गोलरक्षकले रोकेका थिए। शारीरिक रुपमा बलिया खेलाडीको सामु नेपालको यु–१६ टोलिको आजको खेल अहिले सम्मकै सबैभन्दा कमजोर देखिएको प्रशिक्षक बालगोपाल महर्जनले बताए।
दसैपछि प्रशिक्षण नभएकाले पनि अभ्यासको अभाबमा खेलाडीको प्रदर्शन कमजोर भएको उनले बताए। आजको खेलमा कुनैपनि खेलाडिले राम्रो गर्न नसकेको र यो नतिजाले आफूलाई निरास बनाएको महर्जनले बताए।
अन्तिम समयमा जुटाएको खेलाडीले पनि उत्कृष्ट प्रदर्शन गरेको हङकङका प्रशिक्षक राजिव हिराचनको प्रतिक्रिया थियो। हिजो मात्र टिम तयार गरी मैदान उतारेको उनले बताए।
आफ्ना खेलाडी शारीरिक रूपमा बलिया रहेकाले जित सुनिश्चित भएको हिराचनको दाबि छ। आजको बिजेताले अब क्वाटरफाईनलमा भुटानको सामना गर्नेछ।
प्रतियोगिता अन्तर्गत भोलि पहिलो क्वाटरफाईनलमा मनाङ मर्स्याङदी क्लब र जावलाखेल युथ क्लबबिच प्रतिस्पर्धा हुने आयोजक कास्की जिल्ला फुटबल संघले जनाएको छ।
तस्विर साभार गोलनेपाल
