११ वर्षको उमेरका स्पेन आएका मेसीलाई सन् २००४ मा स्पेनको २० वर्ष मुनिको टिमबाट खेल्ने अफर आएको थियो तर उनले अर्जेन्टिनाबाट नै खेल्ने बताए। २००५ मा उनकै नेतृत्वमा अर्जेन्टिनाले फिफा युथ च्याम्पियनसिप जित्यो।
यस्तो लाग्छ, उसको खुट्टा ग्लुले बलमा टाँसिएको छ। मैले खेल जीवनमा धेरै महान खेलाडी देखेको छु, तर मेसीले जसरी तिनीहरुले बललाई नियन्त्रण गरेको देखेको छैन- म्यारोडोना
११ वर्षको अन्तर्राष्ट्रिय फुटबल करियरमा लियोनल मेसीले विश्व फुटबलमा अनेक रेकर्ड बनाएर २७ जुन २०१६ मा सन्यासको घोषणा गरेका छन्। स्पेनको नागरिकता लिए पनि सधैँ मातृदेश अर्जेटिनाबाट खेल्ने मेसीले २०१६ को कोपा अमेरिकाको फाइनलमा चिलीसँगको पराजयपछि सन्यासको घोषणा गरेका हुन्।
अर्जेटिनाका चर्चित फुटबलर म्यारोडोनाले कुनै बेला मेसी बारे भनेका थिए– अर्जेन्टिनी फुटबलमा मेरो बिँडो थाम्ने एकजना मान्छे मात्र खेलाडी मैले देखेको छु, ती हुन लियोनल मेसी। मेसीसँग असीमित क्षमता छ। उनी अहिलेसम्मका सबैभन्दा राम्रा खेलाडी बन्न सक्छन्।
मध्य अर्जेन्टिनाको रोसारियो सान्टा फिमा सन् १९८७ को जुन २४ मा जन्मेका हुन्। फ्याक्ट्रीमा काम गर्ने बुवाका तेस्रो सन्तानको रूपमा जन्मेका मेसी बाल्यकालमा ‘ग्रोथ हर्मोन डिफिसेन्सी’बाट पीडित थिए। यो शरीरको वृद्धि विकास रोक्ने रोग हो र यसको उपचार एकदमै महंगो हुन्छ। स्थानीय फुटबल क्लबले मेसीलाई अनुबन्धित गर्न चाहेको थियो। तर, उनको उपचार गर्न पैसा दिन नसक्ने बताएपछि उनी क्लबसँग आवद्ध भएनन्। ११ वर्षको उमेरमा मेसी ट्राइल दिन स्पेनिस क्लब बार्सिलोना आएका थिए।
बार्सिलोनाका तत्कालिन प्रशिक्षक कार्ल्स रिक्याचले न्यापकिन पेपरमा उनलाई अनुबन्धित गर्ने सहमति पत्र लेखे। क्लबले उनको उपचारको खर्च पनि बेहोर्न भयो। त्यसपछि बुवासँगै मेसी पनि बार्सिलोना बसाइँ सरे।
११ वर्षको उमेरका स्पेन आएका मेसीलाई सन् २००४ मा स्पेनको २० वर्ष मुनिको टिमबाट खेल्ने अफर आएको थियो तर उनले अर्जेन्टिनाबाट नै खेल्ने बताए। २००५ मा उनकै नेतृत्वमा अर्जेन्टिनाले फिफा युथ च्याम्पियनसिप जित्यो।
बार्सिलोनाको युथ एकेडेमीमा राम्रो गरेका मेसीले १७ वर्षको उमेरमा सन् २००४ को अक्टोबरमा क्लब खेलमा डेब्यू गरे। सन् २००६ मा बार्सिलोनाले लालिगा र च्याम्पियन्स कप जित्दा उनी टिमका सदस्य थिए। अर्को वर्ष उनी बार्सिलोनाका उम्दा स्ट्राइकर बनिसकेको थिए। त्यो वर्ष २६ खेलमा उनले १४ गोल गरेका थिए।
हंगेरीसँगको मैत्रीपूर्ण खेलबाट अगस्ट २००५ मा मेसीले अर्जेन्टिनाको राष्ट्रिय टोलीबाट अन्तर्राष्ट्रिय फुटबलमा डेब्यु गरे। सन् २००६ को फिफा विश्वकपमा खेल्दा उनी अर्जेन्टिनाका सबैभन्दा कान्छा खेलाडी थिए। २००७ को कोपा अमेरिकामा पनि उनी सबैभन्दा कान्छा खेलाडी थिए। सन २००८को गृष्मकालिन ओलम्पिकमा अर्जेन्टिनाले स्वर्ण पदक जितेका बेला उनी टोलीका महत्वपूर्ण खेलाडी भइसकेका थिए।
सन् २०११ बाट अर्जेन्टिनाको नेतृत्व सम्हालेका उनले देशलाई सन् २०१४ को विश्वकप र लगत्तै २०१५ को कोपा अमेरिकाको फाइनलमा पुर्याए।
सन् २०१२/०१३ मा मेसीले २१ खेलमा ३३ गोलको रेकर्ड बनाएका छन्। बार्सिलोनालाई उनले ८ पटक लालिगाको उपाधि दिलाए भने चार पटक च्याम्पियन्स लिगको।
सन् २००९ र २०१० मा मेसीले बार्सिलोनाका तर्फबाट ४७ गोल गर्दै अर्का खेलाडी क्रिष्टियानो रोनाल्डोको रेर्कड बराबर गरे। त्यसपछि मेसी आफ्ना र अरू खेलाडीका रेकर्ड निरन्तर तोड्दै अघि बढे। सन् २०१२ मा ९१ गोल गर्दै उनले वार्षिक क्यालेण्डरमा सर्वाधिक गोलको रेकर्ड बनाए। यसअघि जर्मनीका ग्रेड मुलरले वर्षदिनमा सर्वाधिक ८५ गोलको रेकर्ड बनाएका थिए। ४० वर्षपछि मुलरको रेकर्ड मेसीले तोडे।
‘४० वर्षसम्मको मेरो सर्वाधिक गोलको रेर्कड उत्कृष्ट खेलाडीले तोडेका छन्। म उनीप्रति खुसी छु। उनी अविश्वसनीय र महान खेलाडी हुन्’, आफ्नो रेकर्ड तोडिएपछि मुलरले भनेका थिए।
सन् २०१० को फिफा विश्वकपबाट मेसीले १० नम्बरको जर्सी लगाउन थालेका हुन्। त्यो विश्वकपमा क्वाटरफाइनसम्म पुगेको अर्जेन्टिनी टिमले जर्मनीसँग ४ गोल खाएर पराजित भएको थियो।
मेसी एक्लै बललाई नियन्त्रणमा राखेर प्रतिद्वन्द्वीलाई छल्दै गोल पोस्टसम्म बल पुर्याउन सक्छन्। ‘यस्तो लाग्छ, उसको खुट्टा ग्लुले बलमा टाँसिएको छ। मैले खेल जीवनमा धेरै महान खेलाडी देखेको छु, तर मेसीले जसरी तिनीहरुले बललाई नियन्त्रण गरेको देखेको छैन’, म्यारोडोनाले भनेका छन्।
‘मैले बच्चामा जसरी फुटबल खेल्थेँ त्यसमा कुनै परिर्वतन गरेको छैन। जसरी बच्चाहरु खुसी हुनका लागि फुटबल खेल्छन्। त्यसरी नै म पनि फुटबल खेल्छु। जसरी बाल्यकालमा खेल्थेँ,’ मेसीले आफ्नो खेलबारे भनेका छन्।
कतिपयले मेसी र पोर्चुगलका स्टार क्रिस्टियानो रोनाल्डोसँग तुलना पनि गर्छन्। रोनाल्डोले मेसी बारे भनेका छन् –मेसीको र मेरो आ–आफ्नै व्यक्तित्व छ। उनको र मेरो खेल्ने आफ्नै तरिका छ। हामी दुबैले ठूला क्लबबाट पनि खेलेका छौं। धेरै कुरामा हामी फरक छौं। तर अहिले उनी नै उत्कृष्ट खेलाडी हुन्।’
मेसीलाई धेरै फुटबल क्लबले महंगो पारिश्रमिक अफर गरेर बार्सिलोनाबाट किन्न खोजे। तर उनी सधैँ बार्सिलोनाप्रति इमानदार रहे। उनी अहिले पनि सबैभन्दा बढी पारिश्रमिक बुझ्ने खेलाडी भित्र पर्छन्। सन् २०१८ सम्ममा मेसीको प्रतिवर्ष खुद आम्दानी १६ मिलियन युरो हुने अनुमान छ। उनको निजी सम्पत्ति १ सय १० मिलियन युरो छ।
अविवाहित मेसीकी एन्टेनेला रुकुजो नामकी केटी साथी छन्। यो जोडीबाट सन् २०१२ मा थियागो नामका छोरा जन्मेका छन्। युनिसेफका सद्भावना दूतसमेत रहेका मेसी बालबालिकाको क्षेत्रमा आफू पनि च्यारिटी चलाउँछन्। अर्जेन्टिनाका अस्पतालमा आफूलाई जस्तै रोग लागेका बच्चाको उपचारमा उनी सघाउँछन्।
२२ वर्षको उमेरमा मेसीले फिफा वर्ष खेलाडीको उपाधि जितेका थिए। मेसीले पाँच पटक फिफा गोल्डेन बल पाए भने चार वर्ष उनी फिफा उत्कृष्ट वर्ष खेलाडी भए। अर्जेटिनाका लागि उनले १ सय १२ खेलमा ५५ गोल गरेका छन्। अर्जेन्टिनाको राष्ट्रिय टिमबाट सबैभन्दा बढी गोल गर्ने रेकर्ड उनकै नाममा छ।
आफ्नो नेतृत्वमा रहेको अर्जेटिनालाई सन् २०१६ को कोपा अमेरिकाको फाइनलसम्म पुर्याउन मेसीले ५ गोल गरेका थिए भने चार वटा गोलका लागि पास मिलाएका थिए। सोमबार बिहान भएको चिलीसँगको फाइनल खेलमा उनी पेनाल्टीमा चुके। फाइनल चिली २ का विरुद्ध ४ गोल गर्दै उपाधि चुमेको थियो। पेनाल्टीमा चुकेपछि मेसी मैदानमै रोए। खेलमा पराजयसँगै लाखौं फ्यानलाई भावविह्वल बनाएर मेसीले अन्तर्राष्ट्रिय फुटबलबाट सन्यास लिए।