क्लब खेलबाहेक राष्ट्रिय टोलबाट खराब प्रदर्शन गरेको आरोप सहदै आएका पोर्चुगिज कप्तान क्रिष्टियानो रोनाल्डोका लागि आज एउटा सुनौलो अवसर आएको छ।
पोर्चुगललाई फाइनलसम्म पुर्याएर आफ्ना आलोचकलाई फेरि एक पटक गतिलो जवाफ दिन आज क्रोएसियालाई पन्छाउने छन्। पोर्चुगिज स्टार नानीका अनुसार रोनाल्डोले यो मौका गुमाउने छैनन्। आफ्नो आलोचनलाई जवाफ फर्काउनेछन्।
नानीले भनेजस्तै साच्चै रोनाल्डोले टिमलाई युरोको उपाधि नजिक पुर्याउलान् त! त्यसको परीक्षा आजराति हुँदैछ।
भाग्यले साथ दिएको पोर्चुगलका लागि कप्तान रोनाल्डोले समूह चरणको अन्तिम खेलमा दुई गोल र १ गोलका लागि सहयोग गरेपछि बुधबार राति हंगेरीसँग बराबरी खेल्दै नकआउट चरणमा प्रवेश गरेको थियो।
योसँगै रोनाल्डो युरोकपको पछिल्लो चार संस्करणमा गोल गर्ने एकमात्र फुटबलर पनि बने। साथै पोर्चुगिज टोलीबाट १२९ खेलमा ६० गोल पुर्याए । रोनाल्डोले पोर्चुगलका लागि पछिल्लो २९ खेलमा २३ गोल गरेका छन्।
समूह चरणका सुरुवाती दुई खेलमा खराव प्रदर्शन गरेका रोनाल्डो सर्वत्र आलोचित बनेका थिए ।
तर, समूहको अन्तिम खेलमा हंगेरीविरूद्ध देखाएको देखाएको बहादुरीले उनी लयमा फर्किएको संकेत देखिएको छ।
‘यदि पोर्चुगललाई युरो २०१६को फाइनलसम्म पुर्याउने हो भने उनको पछिल्लो लयलाई कायमै राख्नुपर्छ,’उनका पूर्व म्यानचेस्टर युनाईटेड टिममेट नानीले भने।
समूहमा अपराजित पोर्चुगलले तीन अंक ल्याएर तेस्रो हुँदै उत्कृष्ट चार टोलीभित्र रहेर नकआउट चरणमा छनोट भएको हो। पोर्चुगलले शनिबार लेन्समा क्रोएशियासँग प्रतिस्पर्धा गर्दैछ।
अब रोनाल्डोले आफ्नो लय छाडेनन् भने उनका लागि आजको खेल एउटा सुनौलो अवसर हुनेछ।
तर समूह चरणमा शानदार प्रदर्शन गर्दै अघि बढेको क्रोएसियालाई कमजोर आँक्न भने मिल्दैन। सन् १९९६ को पहिलो सहभागितामा युरोको क्वाटरफाइनलसम्म पुगेको क्रोएसिया त्यसको दुई वर्षपछि विश्वकपमा तेस्रो हुँदै सनसनी मच्चाएको थियो। युरो कपमा भने क्रोएसिया क्वाटरफाइनलबाट माथि उठ्न सकेको छैन।
समूह चरणमा सन्तुलित प्रदर्शन गरेको क्रोएसियाका खेलाडीहरु उत्कृष्ट लयमा छन्।