असिमजंग कार्कीको निर्णायक गोलमा आयोजक पोखरा ११ ले क्वार्टरफाईनल प्रवेश गर्दा विभागिय टोली एपीएफ क्लब भने तेस्रो संस्करणको पोखरा कपबाट बाहिरिएको छ। आयोजक पोखरा ११ ले ६२ औं मिनेटमा गोल गरेका थियो।
त्यो नै जितको लागि पर्याप्त बन्यो। मनिष तामाङको पासमा कार्कीले वान टच बललाई गोलकिपर अगाडि बढेको अवस्थामा गोल गरेपछि पोखराले क्वार्टरफाईनलको भेट लक्ष्मी बैंक थ्रीस्टारसित पक्का गरेको छ।
पहिलो हाफमा दुवै टोलीले दुई दुई मुभ बनाए। यद्यपी पहिलो हाफमा भने दुवैले गोलको खातालाई खोल्न सकेनन्। र्क्वाटरफाईनल यात्रा तय गराउने गोलकर्ता कार्की म्यान अफ दि म्याचको हकदार बने। २० औं मिनेटमा जाङबो शेर्पाले पेनाल्टीबक्सबाट हिर्काएको साइक्लिङ सट आउट हुन पुग्यो।
आयोजक पोखरा ११ ले पनि पहिलो हाफ हुनभन्दा चार मिनेट अगाडि विवेक गुरुङ छिटो टर्न हुन नसक्दा पाएको अवसरलाई गुमायो। सुनिल विकले पेनाल्टी बक्सभित्र सटपास उपलब्ध गराई दिएका थिए। ४३ औं मिनेटमा एपीएफले पनि अर्को अवसर पाएको थियो। सुदिप सिखाकारको फ्रिकिकलाई शेर्पाले व्याक साईक्लिङ सट हिर्काए तर गोलकिपरको हातमा परेको थियो।
गणेश लावतीले वान भर्सेज वानको अवस्थामा हानेको बललाई पोखरा ११ का गोलकिपर राजु योगीले उत्कृष्ठ बचाउ गर्दै पोखरालाई र्क्वाटरफाईनलसम्म पुग्ने आधारलाई जिवितै राखे। शुक्रबारको खेल यु १६ ले नेप्लीज हङकङ एशोसियसन बीच हुने छ।