सफल पोखरा कप फुटबल प्रतियोगिताको तेस्रो संस्करण आजदेखि सुरु हुँदैछ। पोखरा रंगशालामा हुने प्रतियोगिताको उद्घाटन खेलमा एनआईबिएल फ्रेण्डस र सामसुङ जावलाखेल भिड्दैछन्। कास्की जिल्ला फुटबल संघको आयोजनामा हुन लागेको प्रतियोगिता कात्तिक १६ गतेसम्म चल्नेछ।
उद्घाटन खेलमा भिड्ने दुवै टिमका प्रशिक्षकहरुले दसैंको लामो बिदाको कारण प्रशिक्षणलाई निरन्तरता दिन नसक्दा केही समस्या रहेको बताएका छन्। 'दसैंको लामो बिदाले चुस्त प्रशिक्षण हुन पाएको छैन,' सामसुङ जावलाखेल यूथका प्रशिक्षक राजकुमार केसीले भने, 'प्रशिक्षणलाई निरन्तरता दिन पाएको भए अझै राम्रो हुन्थ्यो।'
ब्रिटिश गोर्खा कपपछिको २ महिनाबाहेकको समय खेलाडीले निरन्तर प्रशिक्षण लिईरहेकोले टिम राम्रो रहेको केसीको भनाई छ। राम्रो खेल्ने अपेक्षासहित पोखरा आएको उनले सुनाए। ब्रिटिश गोर्खाकपमा यीनै दुई टिम भेट भएका थिए। उक्त खेलमा जावलाखेलले १–० मा फ्रेण्डसलाई हराएको थियो। अर्को टिम एनआईबिएल फ्रेण्डसका प्रशिक्षक मेघराज केसीले लामो समयको प्रशिक्षण 'ग्याप' हुँदा केहि समस्या रहेको बताए।
ब्रिटिश गोर्खाकपपछि खेलाडीले निरन्तर प्रशिक्षण लिन नपाएको उनले सुनाए। 'समयको हिसाबले करिब ६ महिना कुनै ठुला प्रतियोगिता भएनन। यो बिचमा खेलाडीलाई प्रयाप्त प्रशिक्षण दिईएको छैन,' फ्रेण्डसका प्रशिक्षक केसीले भने, 'नियमित प्रतियोगिता हुने हो भने मात्र खेलाडीले प्रशिक्षण पाईरहन्छन्। दुबै टिम यस अघिका संस्करणमा उद्घाटन खेलबाटै बाहिरिएका थिए। दोस्रो संस्करणमा सहभागीता नजनाएको जाउलाखेल सफलकपको पहिलो र फ्रेण्डस क्बल दोस्रो संस्करणको उद्घाटन खेलबाटै बाहिरीएका थिए। दुबै टोली यस अघिको हारलाई विसाउदै अघिल्लो चरण प्रबेशका लक्ष्य सहित मैदान उत्रिदै छन्।
प्रतियोगितामा नेपालका उत्कृष्ट ८ टिम, विदेशका तीन र आयोजक एक गरि १२ टिमले प्रतिश्पर्धा गर्दैछन्। प्रतियोगितामा लक्ष्मीहुण्डाई मनाङ मर्स्याङदी, लक्ष्मी बैंक थ्रीस्टार, एनआइबिएल फ्रेण्डस, सामसुङ जावलाखेल यूथ, यति हिमालयन शेर्पा, त्रिभुवन आर्मी, एपिएफ क्लव, यू–१६ राष्ट्रिय टिमले प्रतिष्पर्धा गर्नेछन्। त्यस्तै आयोजक पोखरा–११ पनि प्रतिश्पर्धा गर्दैछ। विदेशी टिममा नेप्लिज फुटबल एशोसिएसन–हङकङ, यति फुटबल क्लव–अस्टे्रलिया र भुटानको ए डिडिजन क्लव पनि सहभागि हुँदैछन्।
यो संस्करणका विजेताले ३ लाख ५५ हजार र उपविजेताले २ लाख १ हजार रुपैयाँ पुरस्कार पाउनेछन्। अघिल्लो संस्करणमा विजेताले ३ लाख ५ हजार र उपविजेताले १ लाख ५१ हजार रुपैयाँ पुरस्कार पाएका थिए। त्यसबाहेक विभिन्न विधामा उत्कृष्टता प्रदर्शन गर्ने खेलाडीलाई पुरस्कृत गर्ने एन्फा कास्कीले जनाएको छ। प्रतियोगिताको सर्वाेत्कृष्ट खेलाडीलाई मोटरसाईकल पुरस्कार दिईने आयोजकले जनाएको छ। उत्कृष्ट गोलकिपर, मिडफिल्डर, डिफेन्डर, स्ट्राईकर, सर्वाधिक गोलकर्ता र प्रशिक्षकले जनही १५ हजार रुपैयाँ पाउनेछन्।