तस्बिरः नारायण महर्जन/सेतोपाटी
नेपाली राष्ट्रिय फुटबल टोलीका मिडफिल्डर राजु तामाङ यस वर्षको सर्वोकृष्ट फुटबलर घोषित भएका छन्।
अखिल नेपाल फुटबल संघ एन्फाले मंगलबार राजधानीमा आयोजित एक कार्यक्रममा तामाङलाई वर्षको सर्वोकृत खेलाडीको सम्मान प्रदान गरेको हो। उनले २५ लाख पाउनेछन्।
एन्फाले यसअघि वर्षको सर्वोकृष्ट हुने खेलाडीलाई अपार्टमेन्ट दिने गरेको थियो। तर, यो पटक नगदबाटै सम्मान गरिने भएको हो।
हल्चोकमा भएको विशेष कार्यक्रममा प्रधानमन्त्री केपी शर्मा ओलीले तामाङलाई २५ लाख रुपैयाँको चेक हस्तान्तरण गरेका हुन्।
पुरस्कार रकम हात पार्दै तामाङले आफूलाई गौरव लागेको बताए।
तामाङले पछिल्लो २ वर्ष राष्ट्रिय टोलीबाट खेलेका छैनन् । पछिल्लो पल्ट उनले सन् २०१४ मा फिलिपिन्ससँगको मैत्रीपूर्ण खेल खेलेका थिए । उनले सन् २००५ मा बंगलादेशमा भएको साफ च्याम्पियनसिपमा पाकिस्तानविरुद्धको खेलमा राष्ट्रिय टोलीबाट डेब्यु गरेका हुन् ।
राष्ट्रिय टोलीको जर्सीमा ४५ खेल खेलेका उनले जम्मा २ गोल गरेका छन् । ३० वर्षे उनले एशिया कप २०१५ को छनौट चरणमा नर्थन मारियना आइल्याण्डविरुद्धको खेलमा पेनाल्टीमार्फत गोल गरेका थिए । त्यस्तै उनले सन् २००८ को साफ च्याम्पियनसिपमा पाकिस्तानविरुद्ध पनि गोल गरेका थिए ।
