आगामी कात्तिक ५ देखि सुरु हुने तेस्रो सफल पोखरा कपको सम्पूर्ण तयारी पुरा भएको छ। प्रतियोगिताको लागि मैदान ब्यवस्थापना, बैकल्पिक प्याराफिट निर्माण लगायतका काम पुरा भएको आयोजक कास्की जिल्ला फुटबल संघले जनाएको छ।
आयोजकले आज पत्रकार सम्मेलन गरी प्रतियोगितामा सहभागि हुने टिमहरु पोखरा आउने क्रम सुरु भएको जनाएको छ। प्रतियोगितामा सहभागिताको लागि अष्ट्रेलियाको यति एफसि, नेपलिज फुटबल एसोसिएसन हङकङ र फ्रेण्ड्स क्लव पोखरा आईसकेका छन्।
कात्तिक १६ सम्म पोखरा रंगशालामा हुने प्रतियोगितामा नेापलको ए डिभिजनका ७ टिम, १६ वर्ष मुनीको राष्ट्रिय टोली, बिदेशी ३ र आयोजक सहित १२ टिमले सहभागिता जनाउनेछन्। प्रतियोगितामा साविक विजेता मनाङ मस्याङदी क्लव, ए डिभिजन लिग च्याम्पियन थ्रीस्टार क्लव, त्रिभुवन आर्मी क्लब, सशस्त्र प्रहरीको एपीएफ, फ्रेण्ड्स क्लव, जावलाखेल र हिमालयन शेर्पा गरी ए डिभिजनका ७ टोली सहभागी हुनेछन्।
त्यस्तै यु–१६ राष्ट्रिय टिम र आयोजक पोखरा ११ ले पनि प्रतियोगितामा सहभागिता जनाउनेछन्। बिदेशी टिममा अष्ट्रेलियाको यती एफसी, हङकङ नेप्लीज फुटबल एसोसिएसन र भुटानको ए डिभिजन क्लबले सहभागिता जनाउनेे संघका अध्यक्ष गोपी बहादुर भट्टराईले बताए।
प्रतियोगिताको विजेताले नगद ३ लाख ५५ हजार र उप–विजेताले २ लाख १ हजार रुपैयाँ पुरस्कार प्राप्त गर्नेछन्। त्यस्तै उत्कृष्ट खेलाडीलाई एउटा मोटरसाईकल प्रदान गरिने आयोजकले जनाएको छ। प्रतियोगितामा बिभिन्न बिधामा उत्कृष्ट खेलाडीलाई नगद १५ हजार प्रदान गरिने संयोजक कुमार गुरुङले बताए।
पोखरा रंगशालाको मौजुदा प्याराफिट सानो भएकाले दर्शक सुबिधाको लागि १५ सय क्षमताको बैकल्पिक प्याराफिट समेत निर्माण गरिएको छ। प्रतियोगिता अवलोकनको लागि क्वारटफाईनलसम्म ५० रुपैया , सेमिफाईनल र फाईनलको लागि एक सय रुपैया टिकट दर कायम गरिएको छ। प्रतियोगिता सम्पन्न गर्न ५० लाख खर्च अनुमान गरिएको छ भने १५ लाख बचतको अपेक्षा गरिएको छ।
प्रतियोगिताको प्रयोजकबाट ६५ लाख आम्दानी हुने र टिकटबाट मात्र २५ लाख रुपैया उठाउने आयोजकको अनुमान छ। यस वर्ष प्रतियोगितामा सहभागि सबै टिमका खेलाडीको बिमा गर्न लागिएको एन्फा कास्कीले जनाएको छ। त्यस्तै तीन वटा प्रवेशद्धारमा सिसि क्यामेरा राखिने भएको छ। प्रतियोगितामा सहभागि हुने आयोजक टोली एक महिनादेखि प्रशिक्षणमा छ। पुष्प केसीको प्रशिक्षणमा घरेलु टोली पोखराको फूलवारीस्थित आर्मी मैदानमा अभ्यास गरिरहेका छन्। आयोजक पोखराले यस वर्ष दुई बिदेशीसहित नयाँ अनुहारका युवा खेलाडी मैदानमा उतार्ने तयारी गरेको छ।
टिम ब्यवस्थापक महेन्द्र गुरुङका अनुसार ब्याईज युनियनका किपर राजु योगीसहित बिदेशी खेलाडीहरु ज्याक अप र आवा नोर्बेट सेड्रिकलाई आयोजकको टिममा सामेल गरिएको छ। यी सहित ब्वाईज युनियनका रवी सुवल र असिमजंग कार्की बाहेक अन्य नया खेलाडी पहिलोपटक अन्तराष्ट्रिय स्तरको प्रतियोगितामा सहभागि हुन लागेका छन्। प्रतियोगिताको प्रचारप्रसारको लागि भोलि बिहान मोटरसाईकल र्याली निकालिने भएको छ।