सचिन तेन्डुलकरले आउँदो नोभेम्बरमा हुने घरेलु संस्करणमा २०० औं टेस्ट खेलेपछि सम्पूर्ण क्रिकेट जीवनबाट सन्यास लिने घोषणा गरेका छन् ।
आगामी नोभेम्बरमा वेस्ट इन्डिजसँग खेलेपछि उनको २४ वर्षे चम्किलो जीवन समाप्त हुने छ । तेन्डुलकरले सन्यासबारे आफ्नो निर्णय बुधबार भारतिय क्रिकेटको उच्च निकाय भारतीय क्रिकेट कन्ट्रोल बोर्ड (बीसीसीआई) मार्फत एक विज्ञप्ति जारी गर्दै सुनाएका हुन् ।
उनले एकदिवसीय क्रिकेटबाट भने गत वर्ष सन्यास लिएका थिए । कमजोर क्रिकेट खेल्दा खेल्दै पनि टिमसँग जोडिरहेका कारण केही समय यता तेन्डुलकरको आलोचना हुन थालेको थियो ।
त्यही आलोचना लगत्तै उनको यो निर्णय आएको हो ।
तेन्डुलकरले विश्व क्रिकेटमा थुप्रै कीर्तिमानहरु रचेका छन्, जसलाई तोड्न आउँदो पुस्तालाई ठूलो चुनौती हुने छ ।
