अखिल नेपाल फुटबल संघ (एन्फा) ले प्रदान गर्दै आएको रूपक स्मृति सर्वोत्कृष्ट फुटबल पुरस्कार- २०७२ बाट शुक्रबार पाँचजना पुरस्कृत भएका छन्। पुरस्कृत हुनेमा फिफा सहायक रेफ्री बिना श्रेष्ठ, कोच विराटकृष्ण श्रेष्ठ, पूर्व फिफा सहायक रेफ्री शैलेश जोशी, पूर्व राष्ट्रिय टिमका कप्तान अनिल गुरूङ, राष्ट्रिय महिला टिमकी कप्तान अनु लामा रहेका छन्।
पाँचैजनालाई जनही एक लाख रुपैयाँ र यामाहा मोटरसाइकल पुरस्कार प्रदान गरियो। उत्कृष्ट खेलाडी, प्रशिक्षक र रेफ्रीलाई उपप्रधान तथा उर्जा मन्त्री टोपबहादुर रायामाझीले पुरस्कार प्रदान गरे।
नेपाली राष्ट्रिय फुटबल टोलीका पूर्वकप्तान एवं फिफा रेफ्री रूपकराजको स्मृतिमा एन्फाले विगत १९ वर्षदेखि पुरस्कार प्रदान गर्दै आएको छ। रूपकराजको २०४९ सालमा हवाई दुर्घटनामा परी निधन भएको थियो।