घरेलु मैदानमा सर्वाधिक पुरस्कार राशि भएको सशस्त्र प्रहरी महानिरीक्षक प्रथम राष्ट्रिय खुल्ला महिला भलिबल प्रतियोगिताअन्तर्गत आज पूर्वाञ्चल महिला भलिबल टिमले मध्यपश्चिमाञ्चल महिला भलिबल टिमको सामना गर्नेछ भने पश्चिमाञ्चलले सुदूरपश्चिमाञ्चलसँग खेल्नेछ। यस्तै नेपाल प्रहरी क्लबले न्यू डाइमण्ड स्पोर्टस क्लबको सामना गर्नेछ।
यसअघि बिहीबार भएको खेलमा नेपाल एपीएफ क्लब, नेपाल प्रहरी क्लब र न्यू डाइमण्ड स्पोर्टस क्लब विजयी भएका छन्।
त्रिपुरेश्वरस्थित राष्ट्रिय खेलकुद परिषद् (राखेप) को कभर्डहलमा भएको सो प्रतियोगितामा एपीएफले सूदुर पश्चिमाञ्चल महिला भलिबल टिमलाई २५–७, २५–१०, र २५–७ को सोझो सेटमा पराजित गर्दै प्रतियोगितामा लगातार दोस्रो जित दर्ता गराएको छ।
बुधबार भएको उद्घाटन खेलमा एपीएफले पश्चिमाञ्चल महिला भलिबल टिमलाई पराजित गर्दै पहिलो जित हासिल दर्ता गराएको थियो। प्रतियोगितामा एपीएफकी नेविका चौधरी प्लेयर अफ दि म्याच घोषित भइन्।
सशस्त्र प्रहरी बल केन्द्रीय खेलकुद समितिद्वारा आयोजित सो प्रतियोगिताअन्तर्गत आज भएको दोस्रो खेलमा नेपाल प्रहरी क्लब विजयी भयो।
प्रहरीले मध्य पश्चिमाञ्चल महिला भलिबल टिमलाई २५–३, २५–१५ र २५–९ ले पाखा लगाउँदै प्रतियागितामा दोस्रो जित हासिल गरेको हो। हिजो बुधबारको खेलमा प्रहरीले पूर्वाञ्चल महिला भलिबल टिमलाई पराजित गरेको थियो। प्रतियोगितमा प्रहरीकी नीताकुमारी शाह प्लेयर अफ दि म्याच घोषित भइन्।
यस्तै आजै सम्पन्न अन्तिम खेलमा न्यू डाइमण्ड स्पोर्टस क्लबले पूर्वाञ्चल महिला भलिबल टिमलाई २५–९, २५–४ र २५–३ ले हरायो। न्यू डाइमण्डकी कृपा अधिकारी प्लेयर अफ दि म्याच घोषित भइन्। प्लेयर अफ दि म्याच घोषित हुने तीनवटै टिम खेलाडीले जनही रु एक हजार पाँच सय नगद पुरस्कार प्राप्त गरे।
